 |
| Premiu Nobel Paz 1996 Jose Ramos-Horta ho Jornalista Freelancer Global Voices Dalia Kiakilir iha momentu sorumutu ho timoroan sira iha Oxford, UK. |
Premiu Nobel ba Paz nian (1996), José Ramos-Horta (JRH), hasoru malu ho komunidade timoroan sira hela iha Inglaterra hodi fo palestra ida sobre “Timor-Leste, Dezafius pos-independensia: Husi Mehi ba realidade”, iha sorumutu informal nebe mak realiza à margem ba Festival Sudeste Azia organiza hosi Sentru Estudus Aziatikus Universidade Oxford nian i eis governante timoroan nudar konvidadus destake ida. JRH hatudu comoção, iha nia pajina Facebook nian, hafoin sorumutu ho timoroan sira.
“Iha Universidade Oxford. Loron hat nia laran, loron ida iha Londres, no loron tolu iha Oxford. Ohin mak palestra inaugural Simposium Estudus Sudeste Aziatiku nian. (...) Durante hau nia estadia badak iha Oxford, hau hasoru malu ho timoroan sira barak. Hau sinti comovido ho forma calorosa oinsa sira nia reagem hare hau. Sira hotu, feto no mane, servisu maka’as no haruka maior parte sira nia osan manan ba familia sira. “Almas generosa.” (...)”
Iha sorumutu ne’e, nebe Global Voices marka presensa, Ramos-Horta hahu hodi dehan katak Timor-Leste “evoluído e acompanhado a evolução normal do tempo”, ne’e positivu ba rai nebe terus hodi konkista independensia. Entermusde investimentu ba futuru, hahu husi seitor edukasaun, JRH koalia katak Governu dadauk aposta iha jerasaun foun hodi haruka joven sira ba rai-liur atu estuda. Nobel ba Paz nian ne’e apela ba timoroan sira, nebe namkari iha mundu-rai-klaran, atu “labele haluha Timor”:
“Servisu no estuda ba, maibe fila, tamba Timor persija imi!”
Timor-Leste muda dadauk ona
José Ramos-Horta fiar katak ita rain iha “franca expansão” hodi dehan katak “oinseluk los” ona, kompara ho tinan 15 liu-ba, fo nudar exemplu evolusaun iha infraestruturas dalan ka luron sira no fornesimentu eletrisidade. JRH fo hanoin hikas katak iha tinan 1999, tinan ikus Indonesia nia ukun, Timor-Leste iha mediku 19 no iha tinan 1975, governasaun portugal nian ramata, iha deit dentista (mediku nehan nian) ida mas iha tiha Portugal. “Ohin Timor iha kuaze 1000 mediku timoroan”, deklara diplomata ne’e. “Infelismente area sira nebe la iha devida atensaun mak Turismu no Agrikultura”, tenik tan.
“Ita ladauk investe ho matenek atu halo Timor-Leste torna auto-suficiente iha seguransa alimentar no manan tan atrasaun turistika!”
Disputa fronteira maritima ho Australia
Foin dadauk, Australia dehan ba Timor-Leste katak “laiha ona conversa konaba Tasi Timor” reasaun ba kazu disputa fronteira maritima nebe Timor-Leste hato’o recentemente ba Nasaun Unidas nian ho forma “Procedimento de Conciliação Obrigatória (PCO)“. PCO ne’e prosedimentu ida nebe sei obriga parte rua hodi tur hamutuk iha meja negosiasaun perante painel independente ida espesialista sira nebe, ba sira nia vez, sei ajuda alkansa parecer amigavel ida entre parte rua.
José Ramos-Horta deklara ba Global Voices katak eis primeiru ministru, Xanana Gusmao, no aktual Governu fo prioridade ba renegosiasaun fronteira maritima ho Australia. No fo-hanoin katak, tuir pareser Xanana Gusmao nian ida, Australia la age ho boa fe refere ba “escândalo das escutas“. No entanto, hatudu preokupasaun basaa mesmu Australia aseita negosia fali, sei lori tempo to’o nia konkluzaun. Diplomata ne’e fo nudar exemplu impasse entre Russia no Noruega nebe lori tinan naruk mak rezolve.
Komunidade halo keixa reprezentasaun diplomatika TL iha Reinu Unidu
Timoroan sira nebe partisipa iha sorumutu ne’e manifesta vontade atu ajuda sira nia rain. Hakarak haruka ajuda hanesan material eskolar ba labarik sira maibe sente difikuldade bo’ot atu komunika ho reprezentasaun diplomatika Timor-Leste, iha Reinu Unidu. Carlos Aparicio, estudante iha Universidade Brooks, dehan:
“Timor iha reprezentasaun ida iha Londres, i ami iha nesesidade atu komunika ho Governu, maibe infelizmente ami nunka hetan resposta”.
José Ramos-Horta lamenta ho difikuldades nebe mak timoroan sira iha diaspora sente no promete hato’o preokupasaun sira hotu no kestaun sira foti iha sorumutu ba entidade timoroan sira.
Sani mos iha versaun Portugues nian:
Dalia Kiakilir
Oxford, 14 Abril, 2016
