 |
| Progarama Miss Timor Amu Basílio: “Eskravizasaun Feto” |
“Tanba kuandu tama iha buat hirak ne’e, organizasaun sira ne’ebé partisipa iha buat ne’e impoin kontratu lubuk ida ba labarik feto sira. Depois hakarak ka lakohi labarik feto sira ne’e tenki kumpri kontratu ne’e tuir buat ne’ebé ke organizasaun haruka,” Amu Basílio ba Timor Post iha nia rezidénsia, Dioseze Baucau, semana kotuk.
Bispu haklaken, koa’lia kona-ba formasaun, igualdade, promosaun no direitus umanus, entaun buat ida Miss ne’e tama mós iha ne’e. Maibé, nia iha pergunta katak oinsá maka Miss Timor ne’e sai promosaun ba feto Timor?
“Dala ruma hatais ne’e ita haree hanesan la kondis ho dignidade feto nian maibé komu kontratu haruka tenki halo. Ne’ebe, ko’alia kona-ba promosaun feto Timor ha’u iha interogasaun balun atu dehan katak pelumenus seidauk esplika loos ha’u la haree oinsá maka akontesimento ne’e promove feto Timor,” nia hatutan.
Amu Basílio haktuir, kuandu nia sei estuda iha Paris (Fransa) iha tinan 1979 ou 1980, iha atividade ida hanesan ne’e joven besik rihun limanulu protesta hasoru buat ne’e.
“Ohin loron ha’u la hatene sé Fransa sei organiza nafatin ou Fransa mós iha nia Miss ka lae. Maibé atu hateten ema barak dehan buat ida ne’e konsideradu promosaun feto nian, maibé ema barak mós la’os hanoin hanesan ne’e,” nia esplika.
Amu hatutan, ita seidauk iha infraestrutura ba turizmu atu simu ema mai atu goza ita nia rai ne’e maibé preukupa liu fali ho Miss Timor.
“Ne’ebe, ha’u hanoin katak inves ita haree ba promosaun infrastrutura turizmu nian, ita buka fali halo promosaun turizmu umanu,” Bispu informa. (gut)
Fonte/Timor Post
Edisaun, 13/05/2013
Sem comentários:
Enviar um comentário