Ministériu Edukasaun hamutuk ho Asosiasaun Chega Ba Ita (ACBIT), lansa livru ho títulu “CHEGA” iha salaun konferensia Ministériu Edukasun, Vila Verde, Díli, iha loron 22 Jullu 2013. Livru hamutuk 7,500 ne’e, atu distribui ba alunu sira iha teritóriu Timor laran tomak.
Ministru Edukasaun, Bendito dos Santos Freitas, hateten, “ Livru ne’e importante ba estudante sira atu estuda no hatene kona-ba istória nasionál ba luta libertasaun nasionál no aumenta referénsia ba materiál didátiku, liuliu kona-ba akontesimentu polítiku hahú iha tinan 1974 to’o prosesu referendu tinan 1999.
Iha fatin hanesan, Manuela Leong, Diretora Assosiasaun Chega Ba Ita (ACBIT), hateten, “Razaun hakerek livur ne’e, tanba bazeia ba rekomendasaun husi CAVR nia relatóriu, ne’ebé ko’alia kona-ba Departementu Edukasaun. Matéria sira-ne’e sai nu’udar mata-dalan ba planu kuríkullu nasionál, atu hanorin istória, siénsia no polítika relasaun internasionál no lei.
Livru CHEGA ne’e iha volume 1 to’o 5, ho pájina hamutuk 230 hakerek ho dalen Portugés. Livru volume dahuluk, hakerek kona-ba rekomendasaun CAVR nian. Volume daruak, hakerek kona-ba istória konflitu, volume datoluk, kona-ba auto-determinasaun. volume dahaat, kona-ba violasaun direitu umanu I no volume 5 hakerek mós kona-ba violasaun diretu umanu II.
Ohin-loron Timor-leste presiza previne konflitu. Tanba Timor-leste nia ukun aan, hetan husi povu Timor-Leste nia sofrimentu. Jerasaun foun tenke hatene istória ne’e. Ita mós ajuda labarik sira, hadook aan husi violasaun iha futuru,” nia dehan.
Marka prezensa iha lansamentu ne’e, Vise Ministru Edukasaun ba Ensinu Sekundária, Virgilo Simith, Vise Ministra ba Ensinu Báziku, Dulce de Jesus Soares, hamutuk ho Diretór Nasionál sira no funsionáriu sira husi (ACBIT).
Sem comentários:
Enviar um comentário