Reflesaun ba hau nia belun Funu na'in, juventude Loriku As'wain, Azilo Politiku no Foin sa'e sira

NELSON TURQUEL

Uluk iha tempu Rezisténsia, hanesan ema barak, ha'u mós entrega an ba Luta Libertasaun Nasionál. Nu'udar ativista ida, no materestu 12 Novembru, ha'u hasoru persegisaun barak, hanesan funu na'in sira seluk hasoru no sempre tuir orientasaun komandu da luta nian, hamutuk ho kolega balun, ha'u haksoit muru embaixada Inglaterra, iha Jakarta, no husu azilu polítiku. 

Hafoin ukun an ha'u fila mai Timór no kontinua halao ha'u nia knaar nu'udar múziku intervensaun no fotógrafu. Ha'u iha ha'u nia pozisaun, maibé ha'u la envolve iha partidu ka organizasaun polítika ida. Ha'u belun ho ema husi partidu, relijiaun no orientasaun oioin, ema boot no kiik, maské ha'u nia hanoin/opiniaun/vontade dala barak bele lahanesan. Ita luta ba nasaun ida ne'ebé livre no demokrátiku no ita tenke respeitu ida-idak nia hanoin no kontribui ba estabilidade iha ita nia rai.

Durante tinan barak nia laran ha'u haleu ita nia rain dala barak. Ha'u to'o iha kuaze fatin hotu hotu no ha'u hasoru beibeik ita nia povu sira ne'ebé hela no moris ho kondisaun la di'ak.

Estadu emerjensia mai agrava no hatudu ba ita katak ita nia populasaun barak liu mak moris iha kiak nia laran no bainhira situasaun estremu hanesan ida ne'e, akontese sira moris iha susar no terus.

Ha'u nia fuan labele haree katak ema barak haree liu ba partidu, posizaun no kondisaun rasik no haluha valór sira ne'ebé uluk ita defende. Uluk ita luta atu liberta nasaun no atu liberta povu. 

Ita luta laos atu harriku ema maibé ita luta atu fó dignidade ba ema. Ita haluha ita nia istória no ita nia dalan? Ita mai husi ne'ebé loos? 

Karik ita nia kompañeiru sira ne'ebé fó isin no ran ba rai ida ne'e bele haree ita nia kondisaun agora daudaun, sira nia hanoin oinsá?

Oinsá mak uluk povu ajuda no tane malu iha tempu Rezisténsia? 

Dala hira mak povu moris iha terus, iha perigo nia laran atu proteje no tulun gerrilleiru no ita nia as'wain sira? Dala hira mak bapa sira tuir ita, joven sira, no povu hasubar ita iha sira nia uma?

Tempu to'o ona atu ita dignifika ita nia povu, atu ita hakotu ita nia egoizmu ba poder no osan atu ita fó liman ba malu no ajuda ita nia povu hamriik ho dignidade.

Belun sira! Ha'u nia belun sira, ha'u nia kolega sira ne'ebé hela besik no sira ne'ebé hela dook ha'u nia kompañeirus da luta, Azilu polítiku, ha'u nia maun alin juventude loriku as'wain, mai ita fó liman ba malu no fó netik ajuda ruma ba ita nia povu kbit laek ida ne'e, boot ka kiik, tuir idak-idak nia posibilidade. 

Lalika haree ba ida idak-idak nia kor polítiku no ba ita nia diferensa sira. Ita nia povu iha fatin barak halerik, depoizde estadu emerjensia, mosu tan udan boot no inundasaun. Povu iha foho dook iha distritu-distritu laiha asesu ba hahán. Iha Díli, iha bairru-bairru ema barak laiha ona nesesidade báziku. 

Fulan ida ikus ami simu ajuda no ami fahe ona ajuda alimentar ba família liu 400. MOVIMENTO FÓ LIMAN BA MALU ladun iha ona sasán barak atu hatán ba pedidu sira ne'ebé loron-loron ami identifika ka mosu mai.

Ami prontu ho ami nia espíritu voluntriado no espíritu sidadania atu kontinua halo distribuisaun karik imi bele ajuda ami.

Ha'u nia respeito no hakoak boot ba imi hotu.

❤Ajuda Ami Ajuda Sira❤

Nelson Turquel

Dili, 30 Maio 2020
👉Sani artigo Asaun Karidade Fo Liman Ba Malu
Assiste PM TMR nia lian menon konaba subsidio