POR UM TIMOR-LESTE MAIS FRATERNO!
“Ha’u mak ne’e! Mai ita la’o hamutuk! Hamutuk lori ukun atu serbi Povu! Labele husik Povu sai atan ba poder!”
Afirmasaun leten ne’e ha’u hakerek iha há’u nia pajina facebook ne’e iha loron 27 fulan junho 2021. Afirmasaun ne’e nudar há’u nia hataan ba ha’u nia kamarada no Companheiro de Luta Loivacho Nelukala Vieira ho Movimento Revolucionário nia proposta atu kandidata ha’u ba Prezidente Republika 2022-2027, nebe publika fulan maiu 2021 nia klaran.
Fulan 5 liu tiha, hafoin halo análize ba situasaun bazeia ba ha’u nia “discernimento” pessoal ba realidade politika Rai Doben Timor Lorosa’e no liuhosi diskusaun ho ha’u nia Companheiro de Luta lubun ida, ohin, loron 19 novembru 2021, ha’u hakarak REAFIRMA ha’u nia PRONTIDAUN atu sai Kandidatu ba Prezidente Republika, periudu 2022-2027.
Ha’u sei partisipa iha kontestasaun eleisaun prezidensial 2022 nudar kandidatu independente ho lema polítiku “Ba Timor-Leste ida Fraternu liu/Por Um Timor-Leste Mais Fraterno.”
Ha’u nia ambisaun maka atu sai Prezidente Republika ida nebe bele garante sosiedade timores ida harmonioza liu. Harmonia nebe garante respeitu mútuo entre sidadaun sira. Respeitu mútuo nebe moris hosi néon livre no laran-luak. Tanba ha’u fiar katak ita ida-idak sei bele goza di'ak liu tan ita nia direito no liberdade bainhira harmonia iha ita nia sosiedade. Ida ne’e la’os de’it ha’u nia ambisaun, maibe aspirasaun Povo Maubere nebe hakerek nanis iha preambulu Konstituisaun RDTL: “...construção de um país justo e próspero e o desenvolvimento de uma sociedade solidária e fraterna.”
Tempu ona atu lori Timor-Leste ba moris ida nebe buras ho sentidu solidariedade no nakonu ho espiritu fraternidade, hanesan ita hakerek ona iha Konstituisaun da Repúblika. Katak moris nudar inan-feton no maun-alin. Inan-feton no maun-alin iha aspetu hotu-hotu moris nian. Tempu ona atu lori povu maubere sai autor ativu ba ninia libertasaun rasik, la’os sai objetu maten dezenvolvimentu nian. Tempu ona Povu Maubere hateke ba oin hodi projeta rasik nia destinu, la’os kesi-an metin ho pasadu hodi nafatin sai atan ba istoria.
Reafirmasaun ida ne’e nudar DEVER CÍVICO ida atu kaer ukun hodi serbi Povo Maubere. Prontidaun ne’e nudar ATO POLÍTICO hodi hataan ba Rai Doben Timor Lorosa’e nia bolu. Bolu atu tane nia, bolu atu serbi nia emar.
Espiritu nebe hamahan ha’u nia prontidaun ohin, hanesan mos espiritu nasionalizmu nebe hamanas ha’u hodi tama iha RENETIL iha 1990 hodi luta ba Timor-Leste nia ukun rasik-an no prontidaun nebe hamanas hau nia espiritu iha loron 19 novembru 1991, tinan 30 liuba iha Indonesia, bainhira hamutuk ho kompanheira no kompanheiru de luta lubun ida halo manifestasaun kontra rejime ditador Soeharto nian hodi protesta hahalok bárbaru militar Indonesia hasoru jovem timoroan sira nebe halo manifestasaun hosi Motael ba rate Santa Cruz. Espíritu atu tau-ses interesse pessoal hodi defende interesse komun (povu) nian. Espiritu nakonu ho aten barani hodi hakilar: LEBIH BAIK MATI DARIPADA INTEGRASI!
Espiritu nebe inspira hosi klosan sira nebe tinan 30 liuba, iha 12 novembru liman-tanan see hirus-matan hasoru militar Indonesia sira iha rate Santa Cruz hodi hakilar: We love Independence more than development! Ami hadomi Independensia liu dezenvolvimentu!
Espiritu nebe inspira hosi klosan sira nebe iha tinan 46 liuba, iha 28 Novembru 1975, proklama Timor-Leste nudar nasaun soberana hodi hakilar: di’ak liu mate nudar nasaun do que mate nudar kolonia! Di’ak liu mate hamriik hanesan ai-hun, do que moris hakne’ak hanesan atan.
Novembru, fulan importante iha historia Rai Doben Timor Lorosa’e. Fulan determinasaun, fulan proklamasaun, fulan esperansa foun.
Ohin, iha fulan novembro ha’u proklama ha’u nia prontidaun atu kandidata-an ba Prezidente Republika. Ohin, fulan novembro, ha’u deklara ha’u nia determinasaun atu ezerse ha’u nia direito politiku nudar Povo Maubere nia oan. Direito atu serbi Povo Maubere.
Prontidaun pessoal no determinasaun politika ida ne’e ha’u sei deklara ofisialmente bainhira dekretu prezidensial sai hodi determina data fixu ba eleisaun prezidensial. Iha neba mak há’u sei deklara loloos razaun sira nebe sai fundamentu ba ha’u nia kandidatura, liliu sa ida de’it mak ha’u sei halo bainhira sai Prezidente Republika.
Ha’u hatene katak kandidatu seluk hosi partidu politiku nian, maski seidauk iha dekretu prezidensial hahu ona rekolha kartaun eleitoral proponente sira nian, tanba sira iha rekursu boot iha aspetu hotu-hotu.
Ba ha’u nia kandidatura, atu informa ba inan-feton, maun-alin, buibere-maubere tomak katak prosesu hotu-hotu hosi rejistu, deklarasaun, kampanha to’o ba eleisaun sei depende ba servisu voluntariu sira nian. Prosesu ne’e inklui mos arekadasaun fundus (fundraising) hodi fasilita prosesu sira ne’e.
Tanba ne’e, aproveita biban ida ne’e, ha'u hakarak fo hatene ba inan-feton, maun-alin, buibere no maubere sira, iha ne’ebe de’it, nebe iha interese atu fo apoiu nudar proponente no mos nudar voluntariu, PREPARA-ba: Mai ita la’o hamutuk! Hamutuk lori ukun atu serbi Povu! Labele husik Povu sai atan ba poder no atan ba istoria! Por Um Timor-Leste mais Fraterno!
Sira nebe hakarak sai proponente, prepara imi nia kartaun eleitoral hodi entrega ba ekipa voluntariu nebe sei ba rekolha.
Ba klosan sira hotu nebe tinan to’o ona atu vota, maibe seidauk iha kartaun eleitoral, favor ba rejista ona. Rejistu sei loke to’o janeiru 2022. Keta lakon ó nia voto! Lakon voto hanesan mos lakon direito!
Atu hetan informasaun kle’na konaba prosesu hotu, favor kontaktu maluk sira tuir mai ne’e Koordenador Ekipa Voluntáriu, Kompanheiru Hortêncio Pedro Vieira Loivacho iha numeru telefone: 77811481
Por Um Timor-Leste Mais Fraterno
Tel: 77961515/73111128
Dili, 19 novembru 2021
Sem comentários:
Enviar um comentário