Parte II Remata
Virus Corona nu’udar família boot hosi virus ne’ebé provoka moras bain-bain hanesan inus-metin common cold ho moras seriu sira hanesan Pneumonia, fallu renal no bele halo mate. Ninia da’et bele hosi animál ba ema tan ne’e egative temi moras ne’e moras zoonosis nomós bele hada’et hosi ema ba ema. Animál ne’ebé sai hanesan hun ba hada’et moras ida-ne’e ladauk hatene ho los, maibé moras ne’e hada’et husi animál ba ema, tanba istória iha Wuhan, Provinsia Hubei, Xina hatudu katak ema barak mak kontaktu ho animál moris iha merkadu animál selvajen sira nian..
Virus Corona nu’udar família hosi virus ne’ebé provoka moras ne’ebé ataka iha sistema respiratoriu. Ba ema normalmente hahú hosi inus-metin bain-bain to’o moras infesaun seriu ba respiratoriu. Virus corona ida-ne’e iha nia maluk ne’ebé molok ida-ne’e mosu ona liuhosi moras rua hanesan moras Middle East Respiratory Syndrome (MERS) iha tinan 2012 ne’ebé mosu iha rai Saude Arabia no sindrom respiratoriu águda/Severe Acute Respiratory Syndrom (SARS) iha tinan 2003 iha Xina.
Virus Corona modelu foun foin deteta iha pasiente ne’ebé hala’o tratamentu iha Wuhan, Xina, iha fulan Dezembru 2019, depois sientista sira fó naran Moras Corona 2019 (COVID-19), ne’ebé mak virus ajente kauzal mak Severe Acute Respiratory Syndrome Coronavirus 2 (SARS-COV2).
Dadus Estudu (Taxa Mortalidade)
Covid-19 kauza hosi SARS-COV2 ne’ebé klasifika nu’udar família boot hosi virus corona ne’ebé hanesan ho virus ne’ebé konsege ataka ema nia sistema respiratóriu; ne’ebé mak atu hanesan ho virus corona ne’ebé ho naran SARS iha tinan 2003. Iha de’it diferensia oituan kona-ba virus rua ne’e. Sintomas ba moras rua ne’e nian hanesan de’it.
Diferente oituan mak COVID-19 ninia da’et maka’as no lais liu se kompara ho SARS. Maibé taxa mortalidade ba COVID-19 to’o ohin loron iha de’it 2% kompara ho SARS-CoV nian ne’ebé mak iha kedas 10%. Taxa mortalidade 2% ne’e dehan iha ema na’in 100 mak hetan infeksaun virus corona ne’e karik, iha de’it na’in 2 mak iha potensialidade boot atu mate. Maioria sira ne’ebé mak hola parte iha 2% ne’e tama iha kategoria hanesan idade avansadu (60 ba leten), fumador ativu sira, no sira ne’ebé iha antes ona moras kroniku sira seluk hanesan diabetes, ipertensaun no moras kroniku sira seluk.
Iha periúdu loron 90 COVID-19 kuaze invade hotu metade hosi nasaun sira iha mundu. Ninia sintoma jerál mak isin manas ≥38 grau Celsius, me’ár maran, ho iis boot/susar atu dada iss. Se iha ema ruma iha perioúdu loron 14 nia laran mak hetan sintomas hanesan ne’e no nia mai ka fila hosi nasaun infetadu sira ka kontaktu direta ba parte Vijilansia Nasional Ministerio da Saude atu halo investigasaun kle’an no halo izolamentu kedas. Presiza iha teste espesifiku ba nia, liuhosi teste laboratoriu atu hatene loloos ema ne’e hetan duni infeksaun ba virus ida-ne’e ka lae.
Daudaun ne’e pasu importante sira-ne’ebé estadu halo ona liuhosi Ministériu Saúde mak alerta no halo advokasia ba populasaun sira hotu liuhosi mídia digital ho tradisionál sira kona-ba perigu hosi COVID-19 no maneira prevensaun sira hasoru moras ida-ne’e rasik. Hakbiit vizilansia iha portu entrada sira tantu aero, terrestre no máritima.
Prepara kna’ar na’in saúde sira ho ekipamentu adekuadu hanesan thermal scanner iha pontu da entrada sira ne’ebé atu deteta temperature ba passajeiru sira ne’ebé mak mai iha aeroportu, portu no fronteira rai maran. Karik passajeiru sira ne’e iha temperature ne’ebé deskonfia, ekipa saúde halo kedas intervensaun liuhosi halo investigasaun kle’an. Maske nune’e, agora tama iha perioúdu ne’ebé seriu liután ba pasajeiru sira bainhira OMS deklara sai hanesan Pandemia ba COVID-19 globalmente.
Estadu foti medida rigorozu liután ho maneira hanesan: halo karantina obrigatoriu ba sidadaun sira-ne’ebé fila hosi rai liur. Tan sira balun bele hetan infeksaun COVID-19 no iha possibilidade boot atu hada’et fali ba ema seluk. Intervensaun sira ne’e hanesan parte ida atu trava COVID-19 hodi la loke liras liután ba fatin seluk iha rai ida-ne’e nia laran.
Hanesan moras sira seluk, COVID-19 bele provoka isin manas, me’ar (maran) no susar atu dada-iss. Maske nune’e la’ós ema ne’ebé kona moras ida-ne’e tenke mate. Maibé nia bele salva bainhira hetan tratamentu adekuadu hosi professional saúde sira nomós depende mos ba sistema immunidade ema ida-idak nian. Normalmente sira ne’ebé mak iha sistema immunidade di’ak bele di’ak fila fali entre semana 2 to’o 4 nia laran.
Maneira Hada’et
Moras ne’e bele espalla hosi gotas (bee-turuk) bainhira me’ar no fanin.. Bainhira nia fani ka me’ár gotas ka kabén ne’ebé nakonu ho virus corona haksoit sai hodi ba para iha sasan ruma nia leten, no la to’o tempu naruk make ma ruma kaer fali kaben kontaminadu ne’e no kaer kedas parte oin (inus, maten no ibu) ema ne’e rasik mós iha possibilidade atu hetan infeksaun viral ida-ne’e. Maibé, kaben sira ne’ebé haksoit sai wainhira me’a no fanin somente to’o metru ida (maximu). Tan ne’e presiza kontrola no mantein distansia ne’ebé seguru ho ema ruma ne’ebé me’ar ka fanin. Atu nune’e hamenus risku hodi hetan infeksaun virus corona ida-ne’e.
Maske nune’e estudu balun akresenta katak virus ne’e sei la moris kleur bainhira nia belit ba materia tan ne’e fase liman ho sabaun ne’e hanesan parte ida efetivu liu no hamoos bebeik superfisie ka fatin kontaminadu ho alcohol ka material desinfetasaun ne’ebé iha hodi nune’e bele hamate virus ida-ne’e.
Dala ida tan, COVID-19 nu’udar família boot ida hosi virus ne’ebé mai hosi animál sira, normalmente virus ne’e identifika iha animál furik sira. Dalai da tan, to’o agora matenek na’in sira seidauk no kontinua hela atu identifika loloos virus ne’e mai hosi animál ida-ne’ebé. To’o agora seidauk iha estudu ida katak COVID-19 mai hosi animál hanesan asu ka busa ka animál fuik sira seluk maibé di’ak liu prevene an kedas liuhosi hahalok simples fase liman ho sabaun antes no depois halo atividade sira. No dook hosi animál tantu maus ka fuik.
Karantina no Izolamentu:
Presiza loron 14 atu hatene loloos períodu inkubasaun ba moras ne’e entaun efetivu tebes foti medida prevensaun balun ho naran koarentena ou izolamentu. Períodu Inkubasaun mak hanesan oras ne’ebé virus ne’e infekta ita to’o ita hetan sintomas, durasaun tempu ida-ne’e mak ita hanaran paríodu inkubasaun. Períodu inkubasaun ema ida-ida nian la hanesan depende ba iha kada ema nia sistema immunidade. Tan ne’e sira-ne’ebé iha sistema immunidade di’ak sei lori loron 14 hodi hetan sintomas wainhira sira hetan infeksaun ida-ne’e. Maibé sira ne’ebé mak iha sistema immunidade fraku (ema idade avansadu, fumador passivu, no iha kondisaun króniku antes) bele iha períodu inkubasaun entre loron 2 to’o 5.
Karantina mak fatin hodi tau ema/animál/ai-horis, sira-ne’ebé iha potensial boot transmite moras ruma. Karantina iha kontestu ida-ne’e koalia kona-ba ema nian. Karantinaa la’ós fatin tau pasiente maibé ema hirak-ne’ebé tama iha kriteriu kazu suspeitu ka konfirmadu ho kazu ruma. Maibé karantina somente fatin atu tau ema sira ne’ebé iha potensial atu hetan infeksaun ida-ne’e tan sira iha kontaktu ho ema ne’ebé konfirmadu ho infeksaun moras corona ka ema sira ne’ebé mai husi fatin afetadu sira.
Fatin karatina ne’e mos tenke adekuadu, kompleta ho bee moos no haris fatin ne’ebé di’ak nomós fornese atendimentu saude minimu karik ema sira ne’ebé iha karantina balun iha istoria hanesan ipertensia, diabetes no inan isin rua. Durante perioúdu kuarantena pesoal balun sei kontrola durante loron ne’ebé determinadu. Durante perioúdu karantinaa mak idenfika ema ruma hetan sintomas COVID-19 (isin manas, me’ar no susar dada iss), pesoal saúde sira sei transfere imediata ba fasilidade saúde (Izolamentu) hodi halo tratamentu.
Izolamentu mak fatin ne’ebé preparadu hosi insitituisaun saúde, kompletu ho ekipamentu médiku sira hodi halo atendementu ba pasiente sira-ne’ebé moras ho kazu espesifiku. Tanba moras ne’e iha risku transmisaun boot, tan ne’e presiza utiliza fatin ne’e hodi izola moras ne’e atu labele da’et tan ba ema seluk. Bainhira ema ida tama ona iha fatin ne’e signifika nia prense ona kriteriu katak nia bele tama iha suspeitu no konfirmadu ho moras COVID-19. Konfirmasaun somente mai husi rezultadu konfirmasaun laboratoriu katak ema ne’e pozitivu ka negative ho infeksaun moras COVID-19 ida-ne’e.
Protesaun ba Professional Saude
Professional saúde sira-ne’ebé halo atendimentu direta ba pasiente ho moras COVID-19 ne’e iha risku boot liu atu infekta ho moras ida-ne’e. Tanba ne’e sira presiza serbisu tuir guia no protokolu ne’ebé apropriadu inklui prosedimentu sira ne’ebé adekuadu hodi proteje sira nia an hosi moras ne’e no presiza utiliza ekipamentu protesaun pessoal ho los no seguru.
To’o agora seidauk hatene loloos bainhira mak virus nee lakon iha atmosfera mundu. Maske estudu preliminaria hosi matenek na’in sira hatudu katak COVID-19 bele aguenta moris to’o oras hirak nia laran depende ba temperature no umidade ne’ebé virus ne’e bele adapta no moris ba.
Dezinfetasaun nuudar dalan simples no efetivu atu oho virus ne’e iha ita nia isin lolon liu-liu liman; tan ne’e fase liman ho bee no sabaun ka uza hand sanitizer hosi alkolu, no koko atu labele kaer bebeik parte inus, ibun no matan wainhira liman seidauk fase ka kontaminadu hela. Tan kanál importante atu virus ne’e bele tama to’o iha ita nia sistema respiratóriu (pulmaun) mak husi matan, inus no ibun.
Vasina ba virus ne’e agora sei dezenvolve hela. Antibiotiku laos alternative ne’ebé diak tan antibiotiku so bele kontra bakteria maibé la’ós virus. Tanba ne’e, antibiotika sei la másimu hodi halo tratamentu ka prevene ba moras ida-ne’e. Ema hirak ne’ebé maihosi fatin afetadu sira frazil atu hetan virus ne’e.
Ba ema hirak ne’ebé sente isin manas, me’ár no susar atu dada iis rekomenda hetan tratamentu lailais no hakbesik an ba fasilidade saúde sira-ne’ebé besik. Ka sira-ne’ebé iha kontaktu direta ho pasiente ho kazu COVID-19 konsidera iha risku ne’ebé boot tebes ba moras ida-ne’e.
Ikus liu, ita hotu presiza atu badinas hodi foti dalan prevensaun nuudar dalan efetivu tebes hotu hakotu transmiasaun virus corona ida-ne’e, liuhosi: Fase liman bebeik ho bee no sabaun ka hand sanitizer alkol nian, mantein distansia ne’ebé seguru ho ema sira ne’ebé iha infekasaun respiratoriu (me’ar no fanin), uza masker wainhira me’ar no fanin, hamos superfisie sira bebeik hanesan meza leten, odamatan nia kaer fatin, jelera nia lolon, no parte hotu ne’ebé ita kaer bebeik, konsumu aihan ho nutrisaun di’ak, konsumu bee ho sufisiente, reduz fuma no hemu tua.
Oras ne’e ita nia saude la’os de’it iha ita nia liman rasik maibé ema seluk mos nia saude iha ita nia liman. Liu hosi suporta malu, ita salva ita nia an, salva maluk sira no salva rai ne’e husi moras perigu ida-ne’e.
Referensia hosi:
- https://www.who.int/emergencies/diseases/novel-coronavirus-2019 http://infeksiemerging.kemkes.go.id/category/situasi-infeksi- emerging/info-corona-virus/
- Wikipedia google
Sem comentários:
Enviar um comentário