RA’IS husi FORUM MAUBISSE (2010-2020): “CONSENSO” & “COMPROMISSO”

RA’IS husi FORUM MAUBISSE (2010-2020): “CONSENSO” & “COMPROMISSO” 

Anotação ba debate GMNTV 23/03/2020

Hau tur hamnasa wainhira hare reacção husi militante Fretilin nebe tolok no hotar hau tan de’it entrevista iha GMNTV konaba “MAIORIA vs MINORIA”. Sira kala tanis mate’an los tan hau la afavor ba Fretilin + PLP. Hanesan los wainhira militante CNRT tolok no hateten aat wainhira hau dehan Fretilin + PD monu no terus tan CNRT + PLP nia hahalok. Maibe, hau la hakfodak tan sira ne’e kakutak “lockdown”. FB sai tiha ona meios ida nebe hau hanaran “GOSIP POLITIK: DEMOKRASI TANPA PARLAMEN, DEMONSTRASI TANPA JALANAN”. Katak, comentário hirak ne’e hatudu duni DEMOCRACIA, maibe la halo iha PARLAMENTO nia laran, no mos la halo DEMONSTRASI iha luron. 

Iha UNITED NATION UNIVERSITY Tokyo, iha 2008 hau ba nudar Director Comissão da Justiça e Paz (CJP), Diocese Baucau nian hau hakerek buat ida nune’e “Not frequently, in struggling democracies, political parties such as Fretilin2000 and CNRT are among the most undemocratic institutions. Often they become captive strong, even autocratic personalities of function as tools of entrenched special interests. Only occasionaly do Fretilin and CNRT represent the view of broad-based constituencies. In society in transition like Timor-Leste, Fretilin and CNRT help foster change themselves (from liberator of the nation and people) subsequently beocme obstacles to representative government and further reform. Fretilin and CNRT can easily become part of the problem for democratic consolidation rathar than part of the potential solution”. 

Loron ida Bispo Baucau nian bolu hau hodi fo hatene katak Mari Alkatiri husu ba Igreja Católica atu bele halo “reconciliação” ba líder histórico sira husi 1974-75 nian. Dala ida tan nudar Director CJP hau iha privilegio no honra boot tebes atu sai Secretario Executivo serviço ida ne’e. Hau convida kedas “leigos católicos” nebe iha partido laran, líder “potencial” no “intelectual”. Mosu mai mak naran sira hanesan RUI MARIA DE ARAÚJO, BENJAMIM CORTE REAL, AURÉLIO GUTERRES, HELDER DA COSTA, LÍDIA DA CONCEIÇÃO, DULCE DE JESUS SOARES no RUI GOMES (husi Igreja protestante). Hakarak atu bolu tan sira seluk, maibe tan dialogo ne’e sei lao bebeik, ... nune’e sira seluk sai “cadangan”. 

Maun Boot lider sira nebe mai participa mak Kay Rala Xanana Gusmão, Mari Alkatiri, Mário V. Carrascalão, Francisco Guterres Lu-Olo, Taur Matan Ruak no José Luís Guterres. Tuir lolos atu bolu mosu ho Fernando de Araújo La Sama (nia rejeita atu tuir, tan la’os geração 74-75; maibe fo apio total nudar PPN). Hau hanoin mos atu bolu ho Rogério Lobato no Abílio de Araújo; to’o F.X. Lopes da Cruz no Domingos de Oliveira. Maibe, tetu tun tetu sae, ikus mai sira nia naran la tama (hein ba fase seluk). Avo Xavier tempo neba moras hela iha Singapura. Molok atu ba liur, hau hasoru uluk Avo Xavier iha Lecidere husu ninia “bensa”. Nia temi bebeik liafuan “Amo cuidado oituan ho ...” (temi naran). Fila husi Singapura mai, hau ba hasoru tan Avo iha Marabia ... husu ninia presença. Maibe, saúde la permite liu atu ba Maubisse. Nia fo hanoin nafatin konaba líder Fretilin sira, no temi naran. 

Los kedas! Horas 2 molok loke FORUM MAUBISSE, Dr. Mari Alkatiri telefone ba comissão organizadora katak Fretilin lakohi tuir ... retira husi processo. Tan sa? Maun Alkatiri lakohi kedas hare Lugu nia oin no Carrascalão tama hotu iha Forum Maubisse. Se haruka Lugu no Carrascalão sai husi Maubisse no fila ba Dili mak Mari Alkatiri ho Lu-Olo hakarak tuir dialogo. Ba fali FORUM MAUBISSE II (iha Lahane) mos, Mari Alkatiri boikot tan dala ida, gara-gara de’it “kadeira” tau la los, tenki muda kadeira sofá atu nia bele tur fali iha fatin oinseluk. Tan de’it “kadeira”, Mari Alkatiri halo ami “panitia” ulun tun ain sae. 

Iha Maubisse 1, hau frustrado full hare Maun Mari Alkatiri nia asneiras. Loraik ne’e, Maun La Sama fila husi Manu-tasi liu husi Maubisse atu fila ba Dili. Hau husu atu nia hapara lai kareta ... tur hamutuk iha sikun oan ida iha Igreja oin ... hau curhat ba nian (matan-wen atu tun sala-sala). La Sama fo hamnasa de’it hau ... ikus mai nia dehan de’it “O nian sei kman, Amo, hau nia aten kalu tiha ona”. La Sama mos curhat ba hau. Ko’alia oituan konaba ninia pensamento ba “ECONOMIA SOCIAL DE MERCADO” (PD hakarak ida ne’e tenki realiza iha TIMOR). Tempo ne’e hau nia kakutak “lockdown” tiha ona, tan ne’e hau la dun fo atenção. Wainhira eleição hotu tiha Xanana kaer fali conceito PD nian ne’e entrega tiha ba Mari Alkatiri hodi implementa iha Oe-Cusse – RAEOA/ ZEEMS. 

Iha fórum MAUBISSE I – II, hau tenki dehan buat ida ... la lori Kay Rala Xanana Gusmão ... buat hotu sei la lao. Iha Leg-I, Xanana hamutuk ho Bispo Baucau mak hamaus Alkatiri atu tuir nafatin DIALOGO. Ramos Horta koko atu “hamaus” Carrascalão ... se bele karik bele fila ba Dili. Hau nia tugas “hamaus” Lugu atu fila ba Dili. Maromak mesak de’it mak hatene saida mak hau hanoin no sente!!! – fulan 8-9 nia laran hau sai “pembantu” ba Bispo Baucau ho leigo sira Rui Araujo, Rui Gomes, Helder, Aurelio, Benjamin atu design FORUM MAUBISSE. Ikus mai ... detik-detik terakhir mak Alkatiri fo “última bala”, maibe la hetan vitoria! Xanana mak manan. Servico grátis, la hetan “gratidão” maibe hasoru “boikot”. Iha Leg II, loraik Xanana mai Lahane atu hare ami nia preparação. Xanana mak design fatin, maibe nia dehan ... “imi la fiar, aban hau nia compadre sei halo asneiras”. Los kedas! Loron atu kick-off Maubisse Leg-2, Xanana nia compadre Alkatiri halo asneiras tan. Nia lakohi tama dialogo, tan “kadeira” tau la los ...!!! Hau la tahan ona, sai ba liur tur iha escada Palacio Nobre nian, hateke tun ba Dili mk hamnasa loke hotu (atu labele tanis).   

Husi FORUM MAUBISSE I-II, Maun Boot sira ko’alia buat barak. Ikus mai “Team Perumus” (Rui Araujo, Rui Gomes, Benjamin Corte Real, Aurelio Guterres, Helder da Costa, Lidia, Dulce no Martinho Gusmão) serviço atu hasai DECLARAÇÃO MAUBISSE.

Secretario Executivo Forum Maubisse, Martinho G. da Silva Gusmão nia tugas mak (1) lori relatório ne’e hodi fo ba Maun Boot sira; (2) halao nafatin contacto ba dialogo sira tuir mai; no (3) hakerek artigo atu promove nafatin Forum Maubisse. Nomor 1 + 3 mak hau halo ho diak; nomor 2 ne’e xumba wainhira hasoru Maun Taur Matan Ruak nudar Presidente da Republica foun ... cuek mak barak. 

Husi Artigo barak nebe hau hakerek, liafuan chave 2 mak hau kaer nafatin “CONSENSO” no “COMPROMISSO”. Saida no oinsa mak ida ne’e bele lao?

CONSENSO: futu lia ida de’it ...

Assunto de interesse nacional, partido hotu-hotu no sira nia líder tomak “FUTU LIA IDA HO TALI FIAR IDA NEON IDA. Assunto ne’e saida?

1. Mina rai no rikusoy tomak Timor nian labele decide mesak. Hotu-hotu tau fiar ba ema ida, lori hikas mai sai hotu-hotu nia kolen.
2. Fronteria marítima nebe lakon ona 50 anos, tenki “hadau fila fali”.
3. Fronteira terrestre ho Indonesia tenki finaliza lalais.
4. Reconciliação nacional, husu Maromak harai perdão mai ita no ita bele perdua malu.

COMPROMISSO

Assunto nebe sai partido nian, partido hotu nebe tama hodi kaer ukun kaer hamutuk ho didiak. 

1. Hametin CULTURA DEMOCRATICA atu respeita Constituição, Lei no Instituição hirak nebe DEMOCRATICAMENTE ELEITAS (preambulo Constituição RDTL). Ne’e katak, tau fiar metin ba PRESIDENTE DA REPÚBLICA nudar órgão “unipessoal” nebe iha nafatin knar boot atu nia mak hasai “liafuan ikus” ka “tesi lia”. Parlamento Nacional nudar fatin atu halo politica tomak.

2. Iha PARLAMENTO NACIONAL tenki iha vontade tomak atu hametin OPOSIÇÃO DEMOCRÁTICA nudar parte ida husi “roda governação” (roda pemerintahan). Ita nia filosofia politica hare PN nudar fatin ba “poderes legislativos, de fiscalização e de decisão politica” (CRDTL artigo 92°). Nudar isin lolon ida karik (nee mak dehan “órgão” ida), iha liman karuk no liman kuana, iha ain kuana iha ain karuk mak bele bok-aan tun sae, nune’e PN tenki metin ho MAIORIA PARLAMENTAR (CRDTL artigo 86° al. g] + artigo 106), maibe fo mos fatin digno ba MINORIA PARLAMENTAR atu sai OPOSIÇÃ DEMOCRÁTICA. Nune’e, partidos políticos sira nebe iha ASSENTO PARLAMENTAR mak kaer ukun lolos.

3. GOVERNAÇÃO atu lao di’ak ita tenki tau sasukat nune’e ...

3.1. SEDE DE EXERCICIO – ne’e mak Conselho de Ministro, lidera husi Primeiro Ministro ho membro governo nebe PM mak hili atu bele ajuda. Nia tenki mai husi Partido sira nebe iha “maioria parlamentar”. 

3.2. SEDE EFFECTIVO – ne’e ita bolu “putra/ putri terbaik”, professor, Doutor, Maestrado, licenciado nebe matenek interpreta, hakerek, ko’alia no ajuda Governo. Sira ne’e bele mai husi PARTIDO saida de’it, bele mos LA IHA partido maibe labele kedas “netral” hasoru VERDADE ... sira nia sasukat 2 de’it – “CONSCIÊNCIA MORAL” no “INTEGRIDADE INTELECTUAL” ho “SOBERANIA ACADEMICA”... ema atu gosta ka la gosta, odio ka vingança, sira ne’e sai duni hanesan “LEGITIMA VANGUARDA” ... sira nia serviço mak le, hakerek no ko’alia ... sira sai kakutak no fuan ho néon ba politica. Keta haluha ... sira INTERPRETA ka fo OPINIÃO. Maibe, PR ka PM ka PPN iha liberdade tomak atu foti DECISÃO. O bele interpreta matenek to’o nebe mos, o la iha kbiit no knar atu foti decisão. 

3.3. SEDE DE APOIO – ne’e mak sira be tur iha “administração” no “técnica”. Sira tun ka sae depende ba “prestação do trabalho” (prestasi kerja), laos partido politico. Fatin ida ne’e tenki “STERIL HUSI PARTICO POLITICO”. Murni PROFESSIONAL. Ita iha COMISSÃO DA FUNÇÃO PÚBLICA nebe tau matan ba sira ... labele partido politico mak mai kokir tun sae iha neba ...

Tan ne’e, ba imi sira nebe KAKUTAK seidauk “lockdown” ho VIRUS LARONA ... rona didi’ak hau nia intervenção konaba CONSENSO no COMPROMISSO. Hau ko’alia liafuan rua ne’e wainhira Fretilin + PD kaer ukun (2017), hau repete hikas wainhira AMP kaer ukun (2018) no hau repete tan agora se AMP hakarak ukun ho “jogador foun”. 

Ita hein to’ok ...

---

Martinho G S Gusmao - RA’IS husi FORUM MAUBISSE (2010-2020): “CONSENSO” & “COMPROMISSO” (Anotação ba debate GMNTV 23/03/2020)