HUSI “ESTADO DE EMERGENCIA” BA “EMERGENCIA DE ESTADO” (Juramento Falso Ramelau, Povo nia ran babeur ona KHUNTO)

 HUSI “ESTADO DE EMERGENCIA” BA “EMERGENCIA DE ESTADO” 

 (Juramento Falso Ramelau, Povo nia ran babeur ona KHUNTO) 

Makaer-ukun sira (detentor do poder) joga politica, halo ESTADO DE EMERGENCIA atu “sulan metin” Povo, mak sira halimar foer, sukit malu, fera malu, sona malu. Ida ne’e KANEK boot nebe hamosu “EMERGENCIA DE ESTADO”.

ESTADO “INSULTO” POVO

Hau hare saida mak KHUNTO halo ne’e tan BABEUR husi NATUREZA ... jura falso iha Ramelau ka terror Povo kbiit laek nia consciência jura ran! Nudar ema católico, hau fiar saida mak Jesus Cristo dehan, “keta jura ho ran, tan moris no mate la’os iha o nia liman; keta jura hodi Maromak nia naran wainhira la halo tuir o nia juramento nia sei fakar fali ba o nia leten”. Hanesan Papa Francisco dehan, sarani sira los nian moris iha “DOLOROSA CONSCIENCIA” (Laudato Sì: 19) wainhira hare “ran sira ne’e hakilar ba lalehan hodi husu justiça, no Maromak sura sira nia mata-wen no sira nia ran mai ita (makaer-ukun) sira nia leten” (Laudato Sí: 70; Genese 4, 9-11).

Ran sira nebe Naimori Bukar obriga ferik-katuas sira kbiit laek, no jovem sira nebe la iha buat ida atu moris ... ran sira ne’e agora fila babeur nia. Tan sa? Tan, nia usa Povo laran mos néon mos nia ran atu hetan voto, maibe nia usa osan hirak nee atu halo uma boot, halo sede partido boot ... maibe, iha laran usa ba actividade imoral. Ran sira ne’e hakilar dadaun ba lalehan, no Maromak hatun ona ninia malisan ba dirigenti KHUNTO.

KHUNTO la hare, katak, halo fulan ida resin, Estado aplica decreto de emergência. Povo (inclui Igreja tomak) koko atu “prudente” – atu taka metin’an, limita sira nia actividade. Hau mos sente hanesan iha 1975, atu han mos sukat atu lao tun sae mos tetu didiak. Ohin loron, Povo atu hetan 5 dolar loron ida mos sorte boot ona. Maibe, hein fulan ida ba US$100 mos Povo loro-loron lao hanesan ba hasoru Bapak sira, tempo uluk Indonesia nian. Hau sente hanesan uluk inan-aman haruka ami ba hein iha “desa” atu hetan fos 10kg, mantega lata ida no susu-wen kadaka oan ida (hau lembra simu 1x depois hotu ona, la simu tan too 1999) ... hein loron tomak, se “desa” nia sasan sedauk mosu, ami fila uma ... hein fali aban! Maibe, ami halo ida ne’e tan Indonesia mak ukun no la iha tan dalan seluk. Agora, ita hetan tiha “Soberano”, Ministro Fidelis Mangalhães ko’alia tiha, depois ema haksolok tiha, nia dada hikas lia ... to’o agora la iha resultado.

Resultado mak agora TMR hakarak sai nafatin PM, Alkatiri hakarak nomeia ona Ministro foun sira. Oh, que insulto. Lae! Humilhações (penghinaan) ba ami.

PM Taur Matan Ruak mos “lockdown” hodi hanoin Povo nia susar no terus. Ninia resultado, buat ida la mosu. Paciente mos la iha; equipamento mos nia la hola (China mak ajuda, tan Xanana mak husu). PR Lu-Olo mos “lockdown” la tun ba base atu visita oinsa mak implementação EE. Maun Boot Alkatiri nunca hatudu nia oin. So wainhira KHUNTO hasai tiha carta atu fera no sobu AMP ba IX Governo mak nia mosu nudar “aswain” atu salva ESTADO, no la’os salva POVO.

Tuir mai, Maun Mari Alkatiri ne’e “Sekjer Fretilin rasa PM no PR”. Nia nomeia uluk ona Ministro sira. Afinal dehan TMR mak PM.

Ba hau, saida mak Mari Alkatiri kedok taho atu Lu-Olo no Taur Matan Ruak namdoras no monu tuir ne’e hanesan hahalok REACCIONÁRIO. Nicolau Lobato dehan, “Reaccionários são os oportunistas que procuram entrar no jogo sem se comprometerem, são os que tentam mover outros para o barulho, para a luta política e se põem detrás dos bastidores a observar a cena, a ver para que lado verga a balança e, depois do trabalho feito, se reclamam ruidosamente o direito de também dividir o bolo” (Cfr., Nicolau dos Reis Lobato, “Sabemos e, podemos, e devemos vencer”, 2018: 81) – Reasionariu katak ema oportunista sira nebe koko hela tama iha jogo laran maibe lakohi lakon buat ida, ema sira nebe koko dudu ema seluk atu halo barulho, ba nia luta politica no nia rasik tur hakamtek iha kotuk atu hateke tuir lalaok sira, hare to’ok kakeu hu ba nebe, no hare buat hotu lao diak ona, nia mos tama lerek rakalele husu ninia direito atu fahe bolu”. Dala ida tan, Nicolau Lobato nia liafuan iha 20 de Setembro de 1974 ... hamrik iha kotuk mak Xavier, Xanana, Sahe no Abilio Araujo. Na’in rua sei moris hela.

Loron-loron durante EE, MA tur hakmatek iha uma. La halo buat ida. Nonok ninian. Ema mak halo serviço. Pelo menos TMR halo – husu EE, depois kedok tun sae Partido sira seluk, liu-liu PD no KHUNTO. Ikus mai, KHUNTO mak kona! Tebes ka lae, KHUNTO amesado?? Se mak ameasa?? Deputado sira halo debate iha PN dehan “ameasa” duni ... maibe, la lori ba PSIK ka Procuradoria, maibe lori fali ba sessão plenária nebe ko’alia konaba CORVID-19.

Agora hare katak PLP manan ona KHUNTO, teki-teki Mari Alkatiri mosu mai hodi nomeia ninia ema sira husi Fretilin atu kaer Governo. Kleur ita la hare Alkatiri. Mosu mai, lori ona ema nain 5 sai Ministro, maibe laos PM mak nomeia!!

PROPOSIÇÃO HUSI “KHUNTO”

Tan sa mak KHUNTO halai husi AMP no hakarak gabung Fretilin + PLP? Armanda Berta (Presidente) ho José Agostinho da Silva (Sekretariu Jeral) hakerek razão rua:

1. Uluk liu, iha carta ne’e sira dehan “Situação Koligasaun AMP seidauk hetan konfirmasaun no aseitasaun husi Presidente da Republica ba existencia husi koligasaun refere hodi fo alternativu ba formasaun IX Governo.

Analisa texto:

Carta hatudu momos katak, KHUNTO la preocupa ho CORVID-19 maibe fadigado liu ho kadeira iha Governo IX. Afinal, Xanana Gusmao ho partido PD, PUDD, UDT no FM fadigado liu ba CORVID-19, PLP ho KHUNTO hamutuk ho Fretilin lufu-lafu liu ho PR Lu-Olo nia “estudos” iha Aitarak laran. Oinsa ita hare klean liu? Resultado husi PR Lu-Olo nia “estuda lai”, sira hatene ona karik exame sei hetan “zero” ba AMP edisi IX, no hili fali AMP edisi X maibe estuda sala, hela fali AMP edisi VII.

a) Partido KHUNTO fera AMP atu hahu IX Governo, ho razão simplicista – hakarak ukun lalais, hakarak sai lalais ministro hatama ema na’in 10 iha governo foun. Hein maka hein, hein bebeik maibe la realiza! Ema na’in 10 ne’e kala la tahan ona.

b) La realiza, tan PR Lu-Olo seidauk hatoo “konfirmasaun no aseitasaun”. KHUNTO hanoin katak PR mak “liurai”, monarquismo nebe manda tuir nia hakarak, no la tuir Konstituisaun. KHUNTO la ba “protes” PR maibe, sobu AMP. Hanesan los ema nebe nia uma nakdoko, nia halai ba hela fali iha ema nia uma ... lalin nia sasan halai lakon. Lakohi hadi’ak no hametin nia uma rasik.

c) Ita bele loke pergunta ida: PR la halo “konfirmasaun no aseitasaun” tan sei hasoru CORVID-19 no EE ka tan Lu-Olo la gosta Xanana? Afinal, KHUNTO vota a favor ba EE, la’os tan hanoin POVO maibe tan hakarak lalais atu forma Governo VIII iha situação “emergência” nia laran.

2. Tuir mai, iha carta ne’e mos dehan “Partido KHUNTO considera deklarasaun konfiansa no apoio tomak husi Sua Excelencia Presidente da Republica Sr. Francisco Guterres “Lu-Olo” ba Primeiro Ministro Taur Matan Ruak atu lidera nafatin VIII Governo Konstitusional. Partido KHUNTO hola partemos iha estrutura Oitavu Governu Konstitusional nunee decide fo apoio ba Oitavo Governo Konstitusional to iha Tinan 2023”.

Analisa texto

a) KHUNTO hare de’it ba declaração PR nian tau konfiansa ba PM atu Taur Matan Ruak mak kaer nafatin. Maibe, Naimori la hatene hanesan mos ninia Presidente Partido no Sekjer katak, declaração PR nian la iha força constitucional. Iha VIII Governu Konstitusional katak CNRT + PLP + KHUNTO. Seluk lae! Se hatama partido seluk, PR sei husu halo tan CONGRESSO ka lae?

b) Tan sa mak Fretilin la ajuda PR atu hamutuk ho Governo funu hasoru inimigo invisível, maibe lisuk atu halo rahun koligasaun foun, AMP IX?? Hau sente, moralmente PR Lu-Olo hatudu duni oinsa mak sobu no tohik esforço ba oin ... nia la ajuda atu hasoru CORVID-19, maibe aproveita atu sobu estabilidade nação.

c) Naimori dehan hadomi no respeita Xanana Gusmão, maibe hadomi Povo. Lae! Lia los mak, TMR fo kadeira VicePM ba Armanda Berta no Ministro 14 ba KHUNTO. Ne’e katak, tuir AMP edisi IX hetan de’it 10, lao tuir PLP + Fretilin nebe forma AMP edisi VIII hetan 15 ... Povo atu mate ba CORVID19 ka mate hamlaha, la’os KHUNTO nia problema. Kadeira 15 barak liu 10 ... ne’e de’it.

“DISOBEDIENCIA CIVIL”

Hau lao sai ba cidade, no kareta barak liu mak movimenta iha Dili laran. La hanesan EE-1 buat hotu lao diak los. Mosu tiha EE-2, ema hahu la tauk ona. Ema hahu lao ba mai. Jovem sira mos rame-rame halo desporto ... hasoru malu ho saudade.

Tuir hau nia hare, bele hatudu katak POVO la hatene katak iha EE-2 ... sira hanoin “bebas” ona. Nune’e sira lao no hasoru malu hanesan buat ida la kona. Halo hakfodak liu mak patrulhamento husi PNTL no F-FDTL la significativo.

Maibe, tebes ka lae POVO la hatene konaba EE-2 ne’e? Sira hatene! Maibe, sira hatene liu katak Partido sira nebe vota a favor ne’e halo “conspiração” atu hases POVO, sulan tama iha uma laran, nune’e Fretilin + PLP + KHUNTO halo MOVIMENTO POLITICO avontade. Povo labele halibur malu, partido sira bele halibur malu atu sona malu no fera malu.

Iha ne’e hatudu ona DISOBEDIENCIA CIVIL ... katak, POVO sira lakohi ona hakruk ba LEI. “Revolta” ki’ik’oan ida ne’e la’os Povo ne’e DELINQUENTE (penjahat), maibe sira nia CONSCIENCIA MORAL hatudu ona katak Partido sira hahu Lohi maka’as POVO.

Se PR no Governo ho PN usa sala ESTADO DE EMERGENCIA ne’e, Timor-Leste sei sofre barak no boot liu tan, basa ninia resultado la’os CORVID-19 mak halo mate POVO, maibe PARTIDO sira mak halo mate ESTADO tomak nia SOBERANI, maibe liu-liu Nação Timor nia DIGNIDADE.

Hau hanoin ESTADO no NAÇÃO, no liu-liu POVO e PATRIA ninia dignidade labele monu iha Naimori no KHUNTO nia okos. Fretilin no CNRT mak bele salva Timor-Leste. Tan naran 2 ne’e mak doko rai iha tempo RESISTENCIA nia laran.

 Martinho G S Gusmao 
 www.facebook.com/gusmao8998/posts/1624108357737293