Timor oan sira hotu iha direitu atu hetan protesaun no seguransa, nunemos ba informasaun sira konaba surto no imprescindível apoio ka tulun nebe ma'ak Guvernu atu fo, liliu ba kbiit laek sira.
Lo'os ona katak Parlamentu Nasional, ohin, 27/4/2020, aprova ona EXTENSÃO Estadu Emerjensia ba fulan ida-tan. Voto a favor ba renovasaun ne'e nudar resposta ida hodi satan hasoru covid-19, ho 37 votus favor, 23 votus kontra, votu 4 mak abstensaun no nai deputadu 1 ausente. Votasaun hatudu "infração" iha aliansa maioria parlamentar foun. FRETILIN, PLP no KHUNTO vota favor. CNRT, FM no UDT vota contra. PD, Mariano Sabino Assanami vota favor no deputadu na'in 3 seluk abstein. PUDD mos abstein.
Ho apoio parlamentu nian, no provavel dekreta husi Nai Prezidente Republika, signifika Timor-Leste tama ona ba faze "segunda volta" nian hafoin kumpri tiha "primeira volta", nebe ho durasaun "30 dias".
Numeru moras pandemia covid-19 sa'e lais, soma hamutuk 24 ona (data ikus), razão pelo qual, guverno husu ba PR atu dada-tan tempo Estadu Emerjensia (EE) ba fulan ida. Com o mesmo argumento "salva povu" husi corona, Francisco Guterres "Lu-Olo" nudar PR haruka kedas karta (22/4) ba Parlamentu Nasional (PN) hodi solisita autorizasaun, nune'e bele dekreta tan EE ba periudu tuir mai.
Prezidente kumpri nia kna'ar hatu'ur iha Artigu 85, alinea g, K-RDTL, nebe dehan "Deklara estadu serku nian ka estadu emerjénsia, tuir Parlamentu Nasionál haruka, wainhira rona tiha ona Konsellu-Estadu, Governu no Konsellu Superiór Defeza no Seguransa nian". Enkontru 22 abril 2020 iha Palasiu Prezidensial rezulta ho apoiu unanimu husi Konsellu Estadu no Konsellu Superior Defeza no Seguransa nian ba extensaun EE. Unanimidade ne'e haforsa liu-tan prezidente nia pozisaun no hein deit "SIM" husi nai deputadus sira iha Uma-fukun.
PN aprova duni pedidu renovasaun EE, signika fulan ida-tan ma'ak ita "sulan" no "hakdasak" hela nafatin iha uma. Iha "primeira volta", fo-foun, parece que, buat hotu la'o diak, povo hatudu nia vontade haktuir ordem EE nian. Maske nune'e, laiha serteza buat ida konaba "moras-da'et" ne'e, esta, por falta de informacoes, muito menos hanoin ba sa'ida ma'ak sei akontese ba sira nia moris (sani: kbi'it la'ek sira) wainhira sulan-an metin iha uma, la sai.
Sentru Integradu ba Jestaun Krize (SIJK) hari'i atu hatan hasoru situasaun ne'e, maibe informasaun konaba surto ne'e rasik sei "simpang siur" hela. Ita asiste kunfuzaun iha fatin balun, nunemos iha karantina. Governantes sira atrapalha, sidi tun-sa'e atu hola desizaun. Ita rona de'it subsidiu 100$, la-kleur "sira" aprova-tan 500.000$. Ida ikus ne'e dehan atu uja "fiskaliza" COVID-19 iha Timor-Leste. Montante rua ne'e sira ko'alia lori povu nia naran, ate balun, ho elegante, defende dehan "ne'e povo nia osan". Maibe iha realidade "kbi'it la'ek" sira ma'ak "tahan-an" no seluk fali la augenta husik matawen turu.
Buat sira ne'e hotu "arrasta" povo ba situasaun difisil. "Bingung" no lakon fiar ba Ukun-Na'in sira. Parado iha uma, hahan laiha, servisu mos laiha, no depois hanaruk-tan "isolamento". Ladi'ak liu mak "aproveitamentu politiku" iha situacao de emergencia ne'e, sa-tan problema lubuk ida mak butuk hela, sidauk rezolve to'o agora desde hahu krize "impasse politica".
Iha loron hira ikus, ita mos hare povu hatudu nia "revolta", nudar forma de protesto ida hodi "walk out" husi Estadu Emerjensia. Estado de espirito, situasaun socioeconimco no teatro politico obriga populasaun sira "quebra-regras" hodi sai husi uma, pasiar. Hanesan fo-sai iha notisia GMNTV, 19 Abril 2020, hatudu momos povo nia descontentamento ho situasaun aktual no liuliu lala'ok politiku sira. Karik, sira sai ba buka moris tamba la'iha apoiu husi governu? Eis uma das questões, apontamentos ba "excelentissimos" sira atu tau atensaun. Nune'e, "tensão" iha primeira EE labele sa'e-tan.
Saida ma'ak akontese, kedas, iha inicio implementasaun EE to'o agora, loron ikus, serve hanesan experiensia ida em "primeira mão" ba kazu Covid-19 iha Timor-Leste. Para alem de infectado sira sofre, povo baibain mos afectado maka'as ba sira nia moris. Surto provoka inserteza, risku ba kontaminasaun, no "isolamento social" bele amenta perigu iha presaun psikolijiku no stress.
Saida mak sei akontese tuir mai, ita la hatene, maibe responsabilidade tomak iha executivo sira. Povo so hein katak saida mak "imi" ko'alia hatudu iha pratika, nune'e, "ami" prontu kolabora no dehan "sim senhor".
Saida mak sei akontese tuir mai, ita la hatene, maibe responsabilidade tomak iha executivo sira. Povo so hein katak saida mak "imi" ko'alia hatudu iha pratika, nune'e, "ami" prontu kolabora no dehan "sim senhor".
E, sim, senhor! – Vamos lá. Hamutuk hasoru covid-19, komesa husi ita-an, salva familia, salva povu, salva Timor no salva mundo no humanidade.
Timor oan sira hotu iha direitu atu hetan protesaun no seguransa, nunemos ba informasaun sira konaba surto no imprescindível apoio ka tulun nebe ma'ak Guvernu atu fo, liliu ba kbiit laek sira.
Dalia Kiakilir
Oxford, 23/4/2010
Sem comentários:
Enviar um comentário