HUSI “ESTADO DE EMERGENCIA” BA “ESTADO DE ALERTA”
Nicolau Lobato dehan – “Contamos com uma força inesgotável ... que é o Povo” (mensagem ba FALINTIL, Aisirimou 13 de Agosto 1975).
Parlamento Nacional sei halo diskusaun atu “extende” Estado de Emergencia. Hau hare, ida ne’e barak liu mak politica no oituan liu mak atu hatan ba “surto COVID-19”. Rona Dr. Rui no ninia equipa, sira fo bebeik naroman boot ida ... ita la iha “paciente” ... iha de’it “suspeito” no “positivo”, maibe laos "paciente". Nune’e, tecnicamente Timor-Leste iha liu forsa atu “manan” funu ida ne’e. Ita nia equipa de saúde dehan ona usa liafuan “surto”, labele dehan “pandemia”. Ne’e de’it hanesan “tenaga dalam” boot tebes!!!!!
Tuir Santo Padre Francisco nia hanoin, katak, perigo boot liu no “terrorismo” maka’as liu mak GENOCIDIO VIRALE. Saida mak ne’e? GENOCIDIO VIRALE katak liu husi movimento politico sira nian, hamutuk ho “media partidária” ka medsos halo rumores, barulho no sukit tun sukit sae atu hamosu pânico.
Exemplo boot liu mak ida ne’e, Dr. Rui Araújo dehan bebeik “lalika pânico”, “hakmatek iha uma”. Ministerio Saude haruka SMS ba ema hotu “labele pânico”, “fase liman bebeik”, hadook’an malu metro ida ho balun. Facil los.
Maibe, pergunta jornalista nian mak konaba “cemitério” no “kaixaun”. Ida ne’e mak sira hakerek no hatun ba publico. Nune’e mosu pânico. Ema iha foho la’os tauk tan sira konaba moras, maibe tauk Dili rahun, ema mate hotu ona – “molok Timor rahun ho CORVID19, ema mate hotu ona tan hamlaha no tauk ba terrorismo partido politico”. Wainhira ita halo comentário, mosu ona “political machine” (mesin politik) nebe tolok no ameasa deit ona. Partido sira la’os ona koko atu fo solução ba CORVID-19, maibe koko atu “halo rahun malu”, “sobu malu”. Halo finge dehan defende POVO, maibe hatama osan US$500,000 hodi hamosu polemica no hatudu sira nia heroismo, maibe vota unanimo (kartaun verde 65). Ida ne’e “insulto boot” ba Povo no Nação.
Hau hanoin, do que hanaruk Estado de Emergencia, di’ak liu PN husu atu reduz ba ESTADO DE ALERTA. Iha Indonesia karik dehan husi “KEADAAN DARURAT”, tun ba “WASPADA”. Ne’e katak, ita tuir Ministerio de Saude atu “alerta malu” ... hotu-hotu alerta malu atu “fase liman”, “hamos ambiente”, no la’o ka tur hamutuk sukat distancia.
Hau hanoin hetan saida mak Nicolau Lobato nia lia-menon ba FALINTIL sira, “CONTAMOS COM UMA FORÇA INESGOTÁVEL E QUE CONTRIBUA DECISIVAMENTE PARA A LUTA, QUE É O POVO” (Aisirimou, Aileu, 13 Agosto de 1975). Ida ne’e hanorin buat boot rua:
1. Sura uluk lai POVO nia força, la’os Estado nia osan ... sa tan Partido Politico nia manobra. Povo ne’e mak lakon fiar ba Estado, ne’e moras todan boot. Iha foho ne’e ami hare momos kedas katak noticia sira husi Dili mai ne’e la fo liu “segurança” sa tan “estabilidade mental” mai foho.
2. “Força”, Conselho Nacional de Defesa e Segurança hamutuk ho Comandante Supremo das Forças Armadas (PR) tenki ser “liman kroat” POVO nian, la’os Partido Politico nian.
Husi ne’e, hau hanoin no sugere de’it, tuir ami ema foho kbiit laek nia hare:
a) Se labele ona, hanaruk de’it ESTADO DE EMERGENCIA ba loron 14 (para halo PR haksolok netik);
b) Hotu tiha ba kedas ESTADO DE ALERTA;
c) Iha ESTADO DE ALERTA nia laran, hau sugere buat rua:
c.1. Povo hakmatek iha uma, fase liman, halao serviço ho hakmatek; lalika rona rumores husi Media partidária ka media nebe gosta halo “genocídio virale”
c.2. Estado de Elerta nia laran, aproveita PR resolve tiha “Emergência de Estado”, se PR lakohi fo ba AMP (tan la gosta Xanana ho nia aliado) então fo de’it ona ba Fretilin ho PLP; ka halo Eleição Foun.
De resto, POVO sei bele moris iha fulan ida nia laran ne’e. Liu tiha ida ne’e hau sente, husi ESTADO DE EMERGENCIA ita sei monu iha EMERGENCIA DE ESTADO nia laran.
Husu ba MAROMAK no Matebian sira atu tahan metin ita hotu.
Sem comentários:
Enviar um comentário