quinta-feira, 11 de junho de 2020

Proposta Alterasaun ba Kódigu Penál hodi Kriminaliza Defamasaun


Iha loron 5 Juñu 2020, Ministériu Justisa konvite organizasaun balun (la inklui La'o Hamutuk) atu hakerek submisaun sira kona-bá proposta lei atu altera Kódigu Penál RDTL atu kriminaliza defamasaun, ofensas no insultu, mezmu tárjetu ne’e kompañia ida ka ema ne’ebé mate tiha ona. Sentensa prizaun tinan ida, bele dobrada ka triplikada se ema ne’ebé sente ofendidu mak funsionáriu públiku ka se insultu halo liu husi média ka media sosiál.

Lusa informa katak, Ministru Justisa Manuel Cáceres da Costa hateten ezbosu lei ne’e sei hodi provoka diskusaun públika ida.
Preambulu husi ezbosu lei ne’e esplika katak lei difamasaun kriminál husi Indonézia la replika iha Kódigu Penál Timor-Leste nian iha 2009, tanba memória husi okupasaun sei ativu hela, maibé tanba agora liu ona tinan 10, memória okupasaun nian komesa lakon ona, no ho popularidade ema uza média sosiál aumenta, entaun nesesáriu atu proteje ema nia reputasaun, liuliu ema ho kargu públiku sira.
Ministériu Justisa, hein autorizasaun husi Parlamentu Nasional atu aprova alterasaun ida ne'e iha enkontru segredu Konsellu Ministru nian, husu ba submisaun sira iha semana ida de'it, molok loron 11 fulan juñu.

Bainhira ema balun rona kona-ba ezbosu ne'e, sira espresa sira nia preokupasaun liu media, inklui:

  • Jose Ramos-Horta: "Ha'u haree hanesan la'ós kestaun prioritáriu ida ba Governu. Em vez de Governu ho parlamentu lakon enerjia ho tempu hodi diskuti lei foun sira, ne'ebé sei hamosu insatisfasaun ba ita nia demokrasia, di'ak liu foka iha dinamizasaun hosi ita nia ekonomia ne'ebé hanesan kompletamente paralizadu. ...  Atu ita fó liberdade total ba ita nia sosiedade hodi ko'alia no kritika. Nune'e maka primeiru-ministru tenki halo, hodi hatudu katak nia maka aas liu duké suspeita ruma hodi hakarak impede opiniaun públiku ho direitu sira hosi sidadaun sira."
  • Mari Alkatiri, Fretilin: "Tenki hein oituan hodi ami sai hosi impase polítika ne'e no tenki hanesan tolerante liu iha faze ne'e, hodi la hamosu saltu sira iha desizaun sira Governu nian. ... Konteúdu hosi proposta hanesan polémiku tebes. No hamosu asaun balun ne'ebé laiha ligasaun ho ita nia kultura no la'ós hanesan razoável iha nível sira konformasaun nian ho konstituisaun rasik. Ne'e hanesan proposta ida maibé bainhira ami aplika saida maka hakerek iha ne'e, ami bele hamosu risku direitu ba liberdade espresaun nian."
  • Joaquim dos Santos, Fretilin, Prezidente Komisaun A, Parlamentu Nasional: "Di’ak liu tenke define didi’ak, labele halo lei para hamate fali ema-nia movimentu. Ita halo lei para organiza ema, nia halo buat ruma karik tenke ser tuir dalan legál. La’ós ita halo lei ne’e halo mate fali ema-nia movimentu sidadaun nian, lae."
         Nia mós dehan "Maibé keta haluha lei ne’ebé Parlamentu ka Governu prodús karik, labele viola fali direitu seluk. Tanba ne’e mak Parlamentu atu hasai lei ida atu proposta hosi Governu ka projetu hosi deputadu sira tenke haree garantia konstitusionál ne’ebé rezerva Liberdade espresaun, Liberdade organizasaun no Liberdade direitu onra. Lei ne’ebé atu hamosu ne’e labele viola fali prinsípiu sira-ne’e."
  • Adérito Hugo da Costa, CNRT, Deputadu: "Tenke halo audiénsia ho entidade hotu-hotu liuliu komunidade mídia sira iha Timor-Leste, sosiedade sivíl no kamada sosiál hotu-hotu para rona sira-nia hanoin. ... Kontestu saida mak [Governu] hakarak introdús, ha’u labele adianta lai ha’u-nia pozisaun maibé hanesan ativista, jornalista iha tempu ne’ebá kaer ba prinsípiu deklarasaun universál direitu umanu ninian."
  • Manuel Monteiro, Asosiasaun HAK: "Kuandu altera lei iha kódigu penal hodi kriminaliza difamasaun, vantajen ba sosiedade mak sei hata’uk sidadaun atu hato’o nia hanoin ligadu atu labele iha kritika ba desizaun ukun nain sira nian no dezvantajen mak sei proteje ukun nain sira duke próteze povu. Dala barak ita preokupa ema tolok arbiru, insulta ema nia privasidade arbiru iha media sosiál, maibé ida ne’e la’ós rezolve husi dalan halo Lei Kriminaliza Difamasaun."
  • Virgilio Guterres, Prezidente Conselho de Imprensa: "Conselho de Imprensa mós hakarak fó hanoin katak aleinde proposta lei ne’e atake ba iha liberdade espresaun no mós kontra espíritu Konstisaun Repúblika Demokrátika Timor-Leste (RDTL) rasik. Tanba ita-nia konstitisaun iha artigu 1, hateten katak estadu Timor-Leste ne’e estadu direitu no demokrásia. ... Husu ba govenante sira atu garante buka lei ruma ne’ebé mosu atu regula no garante liberdade sidadaun ninian, atu nune’e iha Timor-leste ne’ebé indepedente, labele tan iha sidadaun ida tama kadeia tanba de’it nia hanoin diferensa. Iha preokupasaun hosi públiku mós hateten katak liberdadede espresaun no liberdade imprensa la’os liberdade atu defama ema ka trata ema.” (Komunikadu Imprensa)
  • Jose Luis Oliveira, AJAR: "Kona-ba esforsu governu nian atu halo lei kriminaliza difamasaun ne’e ha’u hakarak dehan, ida ne’e hanesan derrota ida ba ita-nia demokrasia no ita atu lori ita nia nasaun atu tama ba ditadura."
  • Hugo Fernandes, membru Conselho de Imprensa: "Ita hakarak sakrifika dignidade ema ida rua nian ho valor respeitu ne'ebe Timor hetan ona iha mundu laran. Ida ne'e laos esforsu ema ida ka rua nian deit, ita konsagra Konstituisaun no Lei sira ne'ebe tun mai, garante duni liberdade imprensa no espresaun entaun tenke sai konsiderasaun."
  • Manuel Cárceres da Costa, Ministru Justisa: "Liberdade Espresaun no Liberdade Imprensa ne’e garantidu ona iha Konstituisaun RDTL artigu 40 ho 41. Agora prinsípiu ezbosu lei kriminaliza difamasaun ne’e mai la’ós atu kastigu ema, favor ida. Lei ne’e atu prevene ita la bele halo sala." (mós Tempo Timor)
  • Duarte Nunes, CNRT, Deputadu: "Ita presiza hanoin didi’ak tanba ohin loron ita haree ezemplu sira iha Amérika nian prezidente mós ema ko’alia no laiha problema. Krítika kro’at ruma, sira iha Konsellu Imprensa mak tenke hodi fó sansaun maibé la presiza kriminaliza."

Submisaun sira
Organizasaun balu hakerek submisaun sira ba Ministériu Justisa, no sira hotu ezije Governu la aprova ezbosu lei ida ne'e:
    • Hafraku demokrasia
    • Viola konvensaun internasionál sira no Konstituisaun RDTL nian
    • Prevene povu atu diskute asuntu importante sira ho sidadaun sira seluk
    • Lembra fali represaun durante okupasaun Indonézia nian
    • Prosesu aprova la loke ba públiku (la liu Parlamentu Nasional transparente)
    • Bele prevene ema, liu liu ema vulnerable ka kbiit laek, atu ko’alia ba autoridade kona-ba atividade sala
    • Bele hata'uk ka hamate organizasaun sosiedade sivíl sira hanesan La'o Hamutuk atu diskute asuntu sira iha públiku
    • La nesesáriu tanba iha mekanizmu sira seluk (alegasaun sivíl, Konsellu Imprensa, Lei “Denúncia Caluniosa”)
    La'o Hamutuk mós esplika bainhira ema deside atu hetan kargu públiku, simu saláriu husi osan povu nia no hetan lisensa atu halo desizaun ne’ebé afeta povu nia moris, sira mós tenke ser simu responsabilidade balun. Se ema sira ne’e la prontu atu simu kritiku, tuir loloos sira la ba buka kargu boot.
Organizasaun internasionál balun mós espresa sira nia preokupasaun, inklui:

Dokumentu

Analiza, notisias no komentáriu iha lian Tetum

LAO HAMUTUK
11 Junho 2020
à(s)

Sem comentários:

Enviar um comentário