Hau hasoru Belinha iha Bali, Indonesia iha tinan sira década 1990 nian. Belinha naran neebe mak kolega sira toman bolu nia. Estuda Direitu tamba hakarak harii Justisa ba ema kbiit Laek sira.
Fila mai Timor-Leste, iha Periodu okupasaun Indonesia nain, Belinha kontinua nia kompremisiu hodi defende direitu umanus. Harii no hola parte iha Komisaun Direitus Umanus no mos KONTRAS.
Hafoin Ukun Ann Belinha kaben ho Jeneral Taur Matan Ruak no kunesidu ho naran Sra. Isabel Fereirra Ruak.
Iha tinan 2005 too 2008, hau servisu ba Komisaun Verdade no Amizade (KVA) entre TImor-Leste no Indonesia no Sra. Isabel Ferreira Ruak nudar Komisaria ida husi TL. Iha debate sira durante iha KVA, Sra. Isabel Ferreira Ruak hatudu nia kontribuisaun signifikante hodi KVA too ba konkluzaun katak Indonesia admite duni komete Krimi Kontra Umanidade Iha TL iha tinan 1999.
Kontribuisaun Sra. Isabel Ferreira Ruak nian ba defende direitus umanus emar Timor nian kontinua halao liu husi Centro Nacional Chega!IP neebe mak hahu husi tinan 2018 too 2023 iha lideransa Primeiru Ministru Jeneral Taur Matan Ruak nian, kontinua fo apoiu hodi implementa Rekomendasaun husi Relatoriu Chega! no Per Memoriam Ad Spem, relatoriu neebe mak Sra. Isabel Ferreira Ruak kontribui signifikante no husik hela nudar nia legadu ida ba Harii sosiedade Timorense neebe mak Inklusivu no respeito ba direitus umanus.
Lao ba Maromak Nia Kadunan Rohan Laek. Husi Leten Aas neeba, kontinua haraik Domin ba ema lian Laek sira hodi sira iha kbiit atu banati tuir Sra. Isabel ‘Belinha’ Ferreira Ruak nia hahalok no lalalok Murak sira.
Lao ba ho Ita Boot nia Mehi Murak Rohan Laek sira Ba Timor-Leste Neebe mak nakonu ho Dame.
Profunda Kondolensia ba Primeiru-Ministru RDTL, Jeneral Taur Matan Ruak no familia hotu hotu ba Lakon Murak ida née!
Hugo Fernandes
Díli, 18 Junu 2023
Sem comentários:
Enviar um comentário