Lafaek Oan Ida Naran TANUKA
Iha loron ida, lafaek-oan ida moris. Nia inan tau tiha nia naran TANUKA. Bainhira TANUKA loke matan, nia haree buat ida kinur, kabuar ho naroman ne'ebe' nabilan loos ba nia. Nia fila ba nia inan hodi husu: "Buat ne'e sa-loos?" Nia inan hatan: "Buat ne'e naran maka loro. Loro ne'e fo moris ba sasan hotu-hotu iha rai hanesan ai, balada ho ema, ho mos fo naroman ba rai no hamanas ita. Ita hotu presiza loro atu bele moris.
TANUKA dehan: "Ohhhh... ha'u gosta loro!"
TANUKA hahu book an. Nia sinte malirin ho mos bokon. Nia husu fali ba nia inan: "Buat ne'e sa-loos? Nia halo ha'u bokon ho malirin." Nia inan simu-hasoru: "Buat ne'e naran maka bee." Bee ne'e monu hosi kalohan iha lalehan. Buat ne'e naran udan. Bainhira udan-been sira nakonu suli tuir kadalak, bele sai debun. Kadalak suli hamutuk, sai mota boot ne'ebe suli tun ba tasi." "Ita moris iha debun, iha bee laran. Nune'e mos iha animal seluk ho ai barak ne'ebe moris iha bee laran hanesan ita. Ikan, boek, manduku, xipu, kadiuk, ho budu-tasi mos moris iha bee laran. Bee ne'e fo-hemu ba sasan hotu-hotu. Ai, balada ho ema sira, ita hotu kuran bee atu bele moris.
TANUKA dehan: "Ohhhh.... nune'e ka? Ha'u gosta bee!"
Nia inan hateten ba nia: "Mai ita ba nani." TANUKA luku bee ho nani tun, nani sa'e, to'o nia hetan buat toos ida. Nia husu fali ba nia inan: "Buat ida-ne'e toos fali, saida maka ne'e?" Nia inan hatan: "Buat ne'e naran maka rai. Ai barabarak moris iha rai nee leten, niat abut tama iha rai okos. Rai ne'e fo moris ba sasan barabarak. Nune'e loro ho bee mos tulun sasan hodi moris iha rai leten."
"Iha sasan seluk tan ne'ebe moris iha rai leten: karau, asu, busa, kuda, fahi, bibi, hanesan mos ema. Ema ho anomal sira ne'e han ai-tahan ne'ebe moris iha rai leten. Ema ho animal balu han fali animal seluk. Ita hotu kuran rai ne'e atu bele moris."
TANUKA admira. "Ohhhhhh... nune'e fali ka? Ha'u gosta rai!"
Nia inan hateten: "Mai ita ba'la'o uitoan!" TANUKA ho nia inan la'o-ba haree rai. Sira la'o to'o buat aas ida nia hun. Buat ne'e aas tebes, to'o lalehan. Nia husu ba nia inan: "Buat ne'e aas tebes, ne'e sa-loos?"
Nia inan hatan: "Buat ne'e ai-hun ida. Ai-hun moris iha rai leten. Ai-hun sira-ne'e fo mahon ba ema, balada ho mos buat sira seluk tan. "Ai-hun barabarak moris hamutuk iha fatin ida maka ita bolu ai-laran. Iha ai-laran ita hetan balada ruma hanesan manu-fuik, samean, lekirauk ho niki. Ita hotu presiza ai atu bele moris."
TANUKA ho nia inan fila fali ba debun. Nia inan hateten: "Oras-ne'e ita deskansa. O kole duni tanba ita la'o dook tebes." TANUKA hatan: "Loos duni, ha'u nia ain kole tebes, maibe bele kole, ha'u mos haksolok tanba ohin ne'e ha'u aprende kona-ba sasan di'ak de'it iha ita-nia mundu-raiklaran." Nia inan hateten fali: "Nune'e duni, sasan sira-ne'e di'ak loos duni. Sasan hotu ne'e fo tulun ba ita moris haree didi'ak kona-ba sasan sira ne'e, tanba ita hakarak moris di'ak."
Nune'e, TANUKA habai an iha kolan sorin, hodi sinte loro nia manas baku ba nia kotuk laran. Nita toba, hodi mehi kona-ba sasan sira ne'ebe nita hetan ohin-loron.
Bibliographic information
Title: Lafaek-oan ida naran Tanuka
Author: Bibi Langker
Contributor: Mary MacKillop Institute of East Timorese Studies
Publisher: Mary MacKillop Institute of East Timorese Studies, 1995
ISBN: 187601900X, 9781876019006
Length: 22 pages
Sem comentários:
Enviar um comentário