Reflexaun Kiik 12 de Novembro - Operação Trepe ho nian Impaktu

Husi: Victor Tavares

Ohin completa tinan 21 Operação Trepe RENETIL consequente ocupação Embaixada EUA iha Jacarta 12/11/1994 - 12/11/2015.

Operacao Trepe Okupa Embaixada USA iha Jakarta

12 Novembru 1994

Iha biban neba tanba RENETIL nudar organização resistência nian, hala'o atividades tuir diretrizes husi Direção Central RENETIL nian ho submissão total ba orientação no ordem husi Comando da Luta. Tanba nee, iha biban nebe RENETIL simu ordem husi Comando da Luta atu halo manifestação iha Jacarta kontra okupasaun ilegal no violasaun DH husi rejime Soeharto nian iha Timor-Leste, organização resistência nee mobiliza ninian militantes no massa apoiantes ba kauza nian hodi fanun no konsiensializa komunidade internasional liu husi manifestasaun iha okaziaun aniversariu masakre Santa Cruz ba dala 3. 

Militantes RENETIL sira atus ba atus desloka husi sidade hirak iha Indonesia laran tomak ba konsentra iha Jacarta.Tanba prinsipiu prinsipal Ukun rasik an nian haruka, militantes RENETIL sira barak mak ninian estudu atu remata ona iha biban neba maibe tanba espiritu nacionalista-patriotica, Antes sem Título do que sem Pátria, hodi nune soe hela sira nian estudu iha Universidades, hodi entrega sira nian an ba sorte no aman Maromak ho Matebian sira nian liman, hodi nune kumpri dever no ordem husi Comando Superior da Luta ninian. 

Nune Operação Trepe iha Embaixada EUA inverte festa APEC nebe Soeharto nudar uma nain ba sorumutu internasional nee rasik nudar mos biban ba Soeharto ho ninian rejime atu promove ninian performance liu husi marketing politic iha sorumutu internasional ida nee. 

Okupasaun Embaixada husi RENETIL, jovens ho trabalhadores Timor oan sira balun karik marka pontu 1 deit hodi aumenta ba dasin pezu ba Luta Libertação da Pátria e do Povo. Naton, ami barak nebee ohin loron ulun molik/kareka, ami seidauk falta membro fisiologia, hau nian fuk sei iha, maibe pontu nebe hetan husi asaun konjunta nee rasik mos iha ninian kustus ba ami individu ida-idak. Aumenta pezu ba ida-idak nian ulun, liu-liu bainhira abandona Embaixada depois de loron 12 iha neba hodi sai ba rai liur, furak maibe rai ema seluk nian. Buat hotu foun, selamat pagi, selamat siang mos la rona ona husi ema seluk ba ita, ida-idak lao la liga rai, la'o hanesan roboot tanba hulan roupa todan, imajina Novembro 1994 malirin ida oin sa. Loron-loron ba fera kakutak hatama verbos ba laran, kalan toba hahu mosu fuan kii, neon basuk bainhira hateke ba kotuk, matan komesa naben, dada iss mos ladun los ona. Kala too ona situasaun SPWW (sindrome pos working in war). Pezu aumenta liu tan ba ida-idak nian ulun bainhira hanoin retoma estudus iha ambinete foun, sosiedade foun, dok ona husi Patria, kalan toba matan taka maibe kakutak ho neon iha fatin seluk, hahu husu ba an rasik, "antes sem título do que sem pátria"? E agora? Iha tiha ona rai ema seluk nian, ida hau nian nee iha nebe? Oin sa hau nian estudus iha neba? Oin sa hau nian estudus iha nee ba oin? Hahu hau nian kursu husi eskada hira? Eskada hira tan mak hau sei hakat iha hau nian estudus? Iha neba hau iha eskada ida nune iha hau nian estudu. Iha nee mai hau hahu husi eskada hira? Eskada hira tan mak hau nian estudu bele hotu? Hau nian tinan sae dadaun, bainhira mak sai nune, sai nune ba? Huuuffff flazelasaun todan tebes, too pontu klimax bainhira fera tiha kakutak hodi hatama verbos balu-balun ba laran sai hanesan bukae atu tama universidade hodi hatutan estudus no remata, ho prinsipiu foun iha ambiente no sosiedade foun "pátria, patria o título faz parte". 

Hasoru susar ba darua: Sistema edukasaun rai ida mos susar mak susar, lulun tiha verbos lubun ida iha ona kakutak, laran mos kontente los tanba hanoin katak se sura ba sura mai kala fulan 6 tan bele remata estudu no hetan ona diploma lisensiatura - S1 ona tanba ida nee mak hau sinti merese hetan. Iha nebe, maromak aileu....lori Transkrip Nilai finalista kursu iha neba nian no deklarasaun husi CIDAC/CDPM (Centro Informação e Documentação Amílcar Cabral/Comissão para os Direitos do Povo Maubere) Organização Solidariedade, promotora kursu Portugues ba ami, hatama prosesu ingresu iha universidade, ema hare dokumentus ema dehan dokumentus ne iha ne la vale. Ema dudu ba escola secundaria adapta para bele hetan ekivalensia 12.º ano/SMA kls III. Tiga bulan nostalgia hamutuk ho labarik SMA sira kala nostalgia masa lalu di SMA. 

Hasoru susar ba datoluk: Hahu hetan uluk gelar s3, sai eskola kalan toba liman ida latan ren toos, liman ida latan iha hirus matan. Los ona...iha neba ema bolu pátria ami iha nemai hatan morremos nós por cá! Seidauk aumenta hanoin familia A agora oin sa? Maun, alin, feton B sei iha ka lae? Subrinho, tiun, amigo C oin sa? Funu tinan hira tan? Bainhira mak povu maubere hetan liberdade? Bainhira mak bele hakat ain sama hikas rain hau moris fatin? Situasaun ida tuir ida seluk hotu-hotu sena an hamutuk iha ulun ida nian laran halo ulun fatuk atu nakfera rahun-rahun. 

Hasoru susar ba dahat: Depois de hetan ekivalensia 12.º ano ho notas 13 valores, tau hamutuk CV, transkrip nilai husi Fakultas Ekonomi Universitas Udayana ho dokumentus seluk-seluk, ba ingresu iha ensinu superior Instituto Superior de Ciências do Trabalho e da Empresa – Lisboa. Husi dokumentus hirak nebe apresenta, certificado ida husi 12.º ho notas 13 valores ne mak sai hanesan pass word hodi tama faculdade. Ema dehan ba hau nune “esquece o passado e inscreve no 1.º ano”. Wiiii moras...sakitnya itu disini! Nudar ema ida nebe nunka desiste husi dificuldades ho modalidade nudar kapital ba moris mak kalma, pasiente no forsa personalidade, sinti laran moras maibe a luta continua. Tanba sa laran labele moras, bainhira hateke ba kotuk, finalista iha universidade indonesia mai europa ema nian sistema la fo ekivalensia. Ho aten boot néon wa’in simu realidade ne hodi inscreve nafatin iha faculdade Sociologia e Planeamento iha ISCTE no frekuenta entre 1996-1999. 

Hasoru susar ba dalima: Setembro negro halo hau nian personalidade nakdoko no kebra total kbiit uitoan nebe hau iha, aumenta tan rona maun ida milisia hakoi moris, liu-liu asiste politika terra queimada husi milisia pro autonomia sira halo ba rai no povu doben Timor LoroSa’e. Stop! Existe outra vida para além dos estudos! Tanba dificuldade financeira selu propinas, aumenta s32 tesi hau ain klor, halo hau hakneak rai. Maibe tanba hateke ba mundu movimenta la para, moris tenke ba oin duni, maka ho experiencia no konhecimentu nebe hau iha mosu hanoin foun katak sei iha dalan seluk ba moris, liu husi forsa ida “saber fazer”. Forsa ida ne fo hikas kbiit mai hau hamrik hikas hodi hakat fali ba vida akademika hodi “restaura” hikas hau nian títulu lisensiadu nebe interrompido desde Novembro 1994 hodi “revalida” hikas grau de licenciatura iha dia 17 de Dezembro 2011. Restauração independência dia 20 de Maio 2002 depois de 27 anos interrompida. Hau nian Título Licenciado interrompido tanba principio “antes sem título do que sem pátria” hahu 12 de Novembro 1994 no “restaura” hikas Titulo ne iha dia 17 de Dezembro 2011, depois de 17 anos interrompido. Ne’eduni bainhira sei iha vontade atu luta ba moris la iha forsa ida mak bele hakotu ita ho ita nian ideário. Sucesso iha ema ida-idak nian liman laran rasik!

Ba heróis Loriku Aswa’in sira 12 de Novembro nian, hau nian respeitu no hakru’uk!