Husi informasaun nebe espalla horkalan nomos haree movimentu no prezensa polisia iha kintu-kantu hanesan "funu atu tama rai" halo sentidu ba Estado Emergencia laiha tiha deit.
Balu fahe info dehan situasaun bele sai pior liu fali Estado Emergencia. Se sai pior liu fali ne'e kal Estado de Sitiu ona. Se tama ba Estado de Sitiu ameasa ka perturbasaun orden publika husi ne'ebe?
Ameasa husi rai-liur? Ummm laiha indikasoens, ne'e kal husi rai-laran duni.
Partidu politiku sira iha Parlamentu Nasional mak kal halo ona perturbasaun hodi obriga sira nian ambisaun ba poder. Pasiensia atu kumpri norma no regras kal laiha ona, nune ansi no uza forsa hodi MANTEIN ka HADAU poder governativa.
Se uza dalan ilegal (la tuir lei) hodi Mantein no Hadau Poder ne'e nudar Golpe ba Estado.
Agora ita nian instituisaun Estado sira ne'ebe tenki servi ho independente (la hakruk ba partidu politiku ruma) no inparsial (la influensiadu husi poder seluk) hanesan PNTL, F-FDTL no Tribunais sira bele halao sira nian knaar ho diak atu solutiona "tensaun politika" ne'e ka lae? Tanba ne'e nudar sasukat ba ita sai ona ba Estado Rezilente ka sei Estado Frazil nune bele konvida fali Forsa Estranjeiru ruma mai hakalma situasaun.
Ummm afinal deklara Estado Emergencia ne'e mos estratejia politika ba ukun laos puru ba infrenta surto Covid-19. Triste tebes ita nian lider sira nian "kualidade Estadista".
Ze Luis Oliveira
Dili, 17 Maiu 2020
Sem comentários:
Enviar um comentário