Kay Rala Xanana Gusmão Nia Mehi

Kay Rala Xanana Gusmão

Nia Mehi

Agio Pereira

Iha debate parlamentár kona-ba OJE AF (Orsamentu Jerál Estadu Anu Fiskál) 2009, líder timór-oan ida dehan katak Primeiru-Ministru nia intervensaun hodi justifika proposta orsamentál hanesan “mehi” ida. Sira seluk ne’ebé kôr polítika hanesan halo tuir loloos de’it estratajema ida ne’e.

Loos duni

Iha nia poema “ Mar Portugês” ka Tasi Portugês – Possessio maris”, Fernando Pessoa haklaken mai ita, nia fiar ida katak: Só ho Maromak nia hakarak, ita ema nia mehi, mak obra ida bele moris”.

IV Governu Konstitusionál ho lideransa Primeiru-Ministru Kay Rala Xanana Gusmão nian, dala ida tan, mai hato’o no defende Orsamentu Jerál Estadu nian.Ida ne’e nu’udár proposta orsamentál ba dala haat dezde-ke nia hahú kaer Governu iha 8 Agostu 2007. Mak orsamentu tinan 2009 nian. Propostas hotu ne’ebé Primeiru-Ministru Xanana Gusmão aprezenta, tenke liu uluk lai husi análizes ne’ebé kle’an tebes, debates naruk no kleur nian, hodi esgota previzoens limites ne’ebé hakerek ona iha Kapítulu VII Rejimentu Parlamentu Nasionál nian, ho títulu “Planu no Orsamentu Jerál Estadu nian”.

Kay Rala Xanana Gusmão lidera Governu ida ne’e, ne’ebé foin iha experiênsia tinan ida ho balu, ho membrus tomak, inklui nia-aan rasik, ne’ebé uluk la iha experiênsia hanesan Membrus Governu, ho apoiu husi deputadus 39 mai-husi partidus polítikus oioin hanesan CNRT,PD, ASDT/PSD no UNDERTIM. Fiar-an, barani, laran moos no hakraik-an ne’e mak atributus ekipa Xanana Gusmão ne’e nian, dezde-ke simu responsabilidade atu ukun rai ida ne’e.

Iha tinan ida ne’e, Governu Kay Rala Xanana Gusmão hasoru realidade instabilidade nasionál, ho besik ema dezlokadus rihun atus ida, no instituisaun governamentál ida ke fraku tebes, administrasaun estatál la iha lideransa, forsas defeza ho seguransa lakon kredibilidade tanba krize, i liu-liu tanba nasaun ida ke foin daudaun konsege hetan-fali nia liberdade liuhosi unidade nasionál ida ne’ebé uluk nunka akontese, maibé to’o ikus fahe fali malu i lakon vizaun komun atu kontinua ho prosesu importante hodi hametin liután independênsia nasionál.

Nune’e, maka Kay Rala Xanana Gusmão hakat tama iha Palásiu Governu atu implementa nia moto katak ‘Liberta ona Pátria, mai ita Libertán Povu’.

Mensajen ida ke inspiradora, katak bele loke ema nia matan ho neon hodi orienta fali Nasaun no hametin fali unidade entre Veteranus asu-wa’in funu-na’in Libertasaun Nasionál nian sira, liu-liu Falintil – nia mane-maluk sira ne’ebé nia rasik mak komanda durante Luta ba Libertasaun Nasionál. I, liuhosi mensajen inspiradora ida ne’e, mak Xanana Gusmão hahú prosesu atu rekupera fali konfiansa husi povu ba nia Governu rasik, konfiansa ida ne’ebé importante tebes hanesan garantia ba lejitimidade kualkér governu demokrátiku ida iha mundu ne’e.

‘Liberta ona Pátria mai ita Liberta tán Povu” hodi troka “ Reziste katak Manán” no “Luta sei kontinua iha frentes hotu-hotu”. Iha fulan balu laran, wainhira foin hahú governasaun, mensajen foun ida ne’e mai fanun no doko fali Veteranus sira nia hanoin, kuda fali iha sira nia ulun serteza no fiar ba knaar ne’ebé sira tenke simu no hala’o iha faze pós-konflitu hodi influensia prosesu dezenvolvimentu nasionál tomak, ba tempu ne’ebé naruk ka longu prazu.

Programa IV Governu Konstitusionál, ne’ebé Primeiru Ministru Xanana Gusmão aprezenta iha Parlamentu Nasionál hetan liután forsa tanba votu konfiansa ida, katak Veteranus sira hotu rekonhese hanesan programa ida husi “ailaran”, programa ida ke, uluk, sei iha ai-laran, “ bainhira la tiru hasoru inimigu, ami tuur hamutuk hodi koalia kona-ba futuru”.

Gerrilheirus sira mós uluk mehi ho dignidade hanesan libertadores nasionais ne’ebé abut nian duni. I sira mehi; mehi katak, karik enkuantu sira sei moris, sei bele haré duni País ida ne’ebé sidadauns hotu-hotu la presiza mata-been fakar-tan tanba sai fali vítimas depois-de independênsia, maibé bele reklama sira nia direitus tanba país ne’e preparadu ona atu garante kondisoens moris ne’ebé ho dignidade no governu ajuda duni sira atu ida-ida bele prepara-an hodi fó kontribuisaun ne’ebé di’ak ba prosesu dezenvolvimentu nasionál.

Kay Rala Xanana Gusmão, mós ema ida ke hori-uluk kedas mehi kona-ba independênsia i nia konsege duni halo sai realidade. Iha tempu independênsia, nia mehi kona-ba estabilidade nasionál i nia konsege duni halo país ne’e moris hakmatek; nia mehi kona-ba FALINTIL-Forsas Defeza Timór-Leste nian ida ne’ebé iha dignidade no forsas polísia PNTL nian ne’ebé iha unidade, motivasaun no kapasidade, i nia halo duni; nia mehi kona-ba país demokrátiku multipartidarista ida, la iha partidu ida mak manda ka ukun mesak, i nia halo duni; nia mehi kona-ba Governu ida ne’ebé bele halibur hamutuk fali komponentes sosias no polítikas, la iha diskriminasaun idiolójika, i nia halo duni; nia mehi kona-ba Governu ida ke bele utiliza rekursus umanus ne’ebé iha no seluktán ne’ebé oras ne’e tuir daudaun formasaun, i nia halo duni; nia mehi kona-ba governu ida ne’ebé bele rona ierarkia Igreja Katólika no servisu hamutuk, la halo aat ba Igrejas sira seluk i nia halo duni; nia mehi katak Veteranus funu-na’in sira sei bele moris netik ho dignidade i esperansa durante sira nia tempu moris ne’ebé badak dauaun ona, i nia halo duni; nia mehi kona-ba feto-faluk no oan-kiak sira tanba funu, katak sei bele hetan netik kondisoens moris ne’ebé di’ak, i nia halo duni; nia mehi katak sakrifísius povu tomak nian ba libertasaun nasionál labele sai fali “regnicídio” ka halakon fali independênsia nasionál, i nia halo duni; nia mehi katak ema faluk no oan-kiak sira vítimas funu nian, sei bele hetan kondisoens vida ne’ebé ho dignidade, i nia halo duni.

Ho Xanana nia mehi bele hetan susesu ida ke boot, i buat ida ke uluk nunka akontese, bainhira nia buka rezolve atentadu 11 Fevereiru 2008. Iha demokrasia ida ne’ebé instituisoens sei fraku tebes, fahe malu no desmoralizada, hodi Xanana nia mehi mak konsege kaer metin Estadu nurak ida ne’e nia moris. Esforsu tomak ne’ebé halo atu asegura Estadu ida ne’e, halo tuir duni kuadrus legais apropriadus ka tuir nia dalan.

Ita bele dehan katak buat hirak ne’e hotu, vitórias hirak ne’e tomak, foin hanesan hakat kiik-oan tanba buat hotu ne’ebé harí ho sakrifísiu boot, ema bele harahun aban-bainrua, bainhira institusioens Estadu nian rasik mak husik duni i lideransa la hatene lós sáida maka sira hanoin ka mehi kona-ba ita nia povu nia futuru.

Maibé Xanana nia mehi sei kontinua. Hakat ida-ba-ida, i, ho laran metin, nia mehi komesa sai realidade, tanba la’ós ninian mesak: mehi hirak ne’e Povu tomak nian. Tanba ne’e, iha tempu naruk, sei bele duni konsolida ka hametin liután.

Povu Timór-Leste laran kontente tanba iha líder sonhadór ka mehi-na’in ida, líder ida ne’ebé nia mehi mak sai hanesan “pedra filosofál” katak fatuk lulik ida ne’ebé ´hodi bele transforma Estadu pós-konflitu ida ba Estadu ida ne’ebé dezenvolvidu, ho nia instituisoens demokrátikas tomak bele funsiona, ho ekonomia vigorizada ka forte i sustentável.

Halo ha’u hanoin fali ema ida ke ladún konhesidu, Bernardo Soares, “heteronómio” ida hotu husi eskritór Fernando Pessoa nian, ne’ebé iha nia obra “O Livro do desassossego” katak Livru kona-ba Laran la hakmatek/Taridu” dehan nune’e “Mehi-na’in mak ema ne’ebé halo asaun” tanba “ ita nia mehi maka sei hatudu loloos ita ne’e sé, buat seluk ne’ebé seidauk sai realidade, pertense ba mundu no ba ema hotu-hotu”.

Eróis foun sira

Xanana Gusmão mehi ho eróis foun. Ba nia, eróis foun mak timór-oan tomak ne’ebé iha ideias atu harí Estadu Demokrátiku, saudável no multipartidáriu, soberanu i dezenvolvidu; maibé la’ós iha de’it ideias, tenke iha mós kapasidade atu transforma sira nia ideias sai realidade, ba ita nia povu nia di’ak.

Ho mehi, Governu ne’ebé Xanana Gusmão lidera komesa halo daudaun buat balu; nia haruka ona ba estranjeiru timór-oan atus-ba-atus atu bá kontinua estuda, atu bá forma sira nia aan, aprende ho povus no países seluk, buat hirak ne’ebé útil ka bele halo di’ak no presiza duni hodi mai ajuda harí ita nia país, país ida ne’ebé harí ho raan-fakar i sakrifísiu husi kombatentes rihun-ba-rihun – mane ka feto, jovens ka labarik, maibé sei presiza tan sakrifísiu husi timór-oan tomak atu bele halo duni sai país ida ne’ebé reflete duni ita nia povu nia istória ne’ebé riku-boot tebes.

Xanana: prizioneiru liberdade

Bainhira inimigu kaer Xanana Gusmão iha 22 Novembru 1992, sira gaba-aan tanba sira nia atu eróiku ida ne’e. Maibé Xanana Gusmão nia disípulu ka alunu ida, komandante guerrilheiru Nino Konis Santana, tenta hasa’e nia gerrilheiru sira nia morál, hodi dehan nune’e: se inimigu la oho nia, entaun ohin duni, komesa daudaun ona fin-da-okupasaun, komesa libertasaun totál ba ita nia pátria ne’ebé ita hadomi liuhotu maibé martirizada dala rihun-ba-rihun.

I Konis iha duni razaun. Nu’udár gerrilheiru, isin-no-klamar, nia hatene katak atu eroiku jenerais indonézius sira nian, la vale buat ida.

Tuun husi foho leten Rai lulik Timór mai pára iha selas ka kadeia Indonézia nian,liuhusi prizaun Semarang, Cipinang to’o Salemba, Xanana hala’o nia moris hanesan gerrilheiru depois prizioneiru, maibé nia kontinua lidera ho vizaun liberdade no independênsia; simu sakrifísius “superhumanus” katak kualkér ema normál labele halo, tinan-ba-tinan sai prizioneiru iha Indonézia, iha fulan neen (6) laran labele kontakta nein ho ema ida, maibé Xanana kontinua mehi nafatin. Loron, oras, minutus no segundus sulan iha inimigu nia kadeia laran, Xanana transforma sai fali momentus ne’ebé furak tebes, la’ós de’it atu bele mehi tan no mehi furak liu, maibé atu halo nia mehi sai riku liután, hanesan oinsá bele harí país ida ne’ebé la’ós de’it hadulas ho lagoa ka bee lihun boot ida de’it ho ai-tahan mesak matak, maibé, país ida ne’ebé buat hotu mesak matak-nabilan, povu mós moris ho isin di’ak, laran haksolok no la kuran buat ida.

Iha kontradisoens rua iha Xanana Gusmão nia konsiênsia ka hanoin. Ida, mak tanba nia la kumpri nia promesa ba gerrilheirus sira katak depois-de libertasaun nia sei la okupa nein kargu importante ida, seluk, maka hanoin kona-ba nia devér, katak devér atu serve, devér atu labele husik monu-lakon fali buat ne’ebé nia gerrilheirus sira konsege hetan ona, tanba sira barak liu mak nia haré rasik mate, entrega sira nia vida tomak atu bele sai realidade, realidade ida ne’ebé tuir duni povu nia mehi tomak.

Nia la konsege halo tuir buat ne’ebé uluk nia hakarak, katak sai de’it hanesan espetadór ka observadór ba faze foun ida iha luta atu defende povu nia soberania, harí Estadu de-direitu demokrátiku, ne’ebé tuir loloos ema doutores ka matenek na’in sira maka tenke halo, maibé realidade polítika nasionál mak obriga Xanana atu kontinua kaer nafatin ró-ahi “ciclópico” ka boot tebes ida ne’e, hodi nune’e labarik timór-oan sira hotu bele iha nafatin esperansa katak, loron ida, sira bele hetan kondisoens moris ne’ebé diák liu, moris feliz liu kompara ho sira nia antepasadus ka jerasaun sira uluk nian tomak, hanesan duni povu modernu ida, halo parte iha mundu globalizasaun.

Promesa atu la okupa nein kargu polítiku ida, muda tiha fali sai realidade ohin loron nian, no konverte ba moto “liberta ona Pátria, mai ita Liberta tan Povu”.

Xanana kontinua hanesan prizioneiru, maibé prizioneiru tanba liberdade. Kadeia ida agora ne’e nian, la halo ho didin ne’ebé ás i ho besi, maibé nia konsiênsia rasik.

Afinál, nia mehi mak komboiu ida ne’ebé halai tuir dalan naruk prosesu polítiku hodi ba to’o libertasaun nasionál!

Komboiu ida ne’e la iha estasoens ka pára fatin nein halo parajens atu Xanana bele tuun ka haksoit sai.

Ita bele, ita hatene ne’ebé tenke halo reforma

Nia mehi mak sai hanesan forsa prosesu ida ne’e nian; mehi hirak ne’ebé reflete ona iha nia moris hanesan gerrilheiru no iha buat tomak ne’ebé nia hakerek; kona-ba forma oinsá nia lidera povu no país ida ne’e, forma oinsá nia lidera Governu ida ne’e no kontribui ba instituisoens Estadu hotu-hotu, hodi avansa nafatin ba futuru. Ba Orsamentu ida ne’e, Xanana mehi atu konsolida nia administrasaun públika ida ne’ebé livre husi interferênsia polítika partidária, estabelese prosesus no mekanizmus atu kombate korrupsaun, hadi’a remunerasaun ka saláriu no rekonhese méritu ho jestaun rendimentu funsionárius públikus tomak nian ho reforma sistema orsamentál no finanseiru Estadu nian.

Wainhira husu ba nia tansá mak nia presiza tan vise primeiru-ministru ida, Xanana hatán loloos de’it nune’e: tanba mákina administrativa tenke hadi’a no tanba jestaun,kontabilidade no finanasas hanesan problema transversál ka afeta instituisoens Estadu nian tomak; tanba burokrasia todan liu i tenke hamenus todan ne’e atu bele aselera prosesu reforma jestaun Estadu. Ba Xanana Gusmão sei presiza haré oinsá orientasoens ministeriais bele hadi’a ezekusaun asaun governu nian i, tanba mákina administrativa mak hanesan forsa eletromotriz ka ne’ebé hamoris ekonomia: ita bele, ita hatene ne’ebé tenke halo reforma.

Karik António Gedeão sei halo duni buat di’ak ida se nia bele dehan ba líder Timór-oan ne’ebé la fó valór ba Kay Rala Xanana Gusmão nia mehi nune’e:

Ó la hatene, nein mehi,

Katak mehi mak komanda moris,

Katak wainhira mane ida mehi

Mundu mós avansa ba oin

Hanesan bola ho kôr oioin

Iha labarik ida nia liman.

FIM

Cordial FH