.
Subscribe to my channel Youtube.com/user/DaLiaMuzic
TAMA LIU MAI BAINAKA SIRA, BEM VINDO E OBRIGADA PELA VISITA!

quarta-feira, 2 de janeiro de 2013

Hau Hakerek Surat Ida Ba O Timor!

HAU HAKEREK SURAT IDA

Surat ne’e hakerek iha momento susar laran nebe mosu no akontese iha hau nia rain doben Timor

Hau hanoin atu sai, la'o ba rai-seluk... maibe hakat-ba sinti todan. Moris ne'e hale’u hau, sulan metin iha luhan "prizaun psikolojiku" nia laran – “penjara mental”.

Ba Ó Timor

Timor,

Dadauk hau hanoin no disidi hakarak ko’alia ho Ó. La hatene tamba saida, maibe hau hakarak tebes duni. Hau sei koko konta saida mak hau sinti no hanoin konaba "Moris ne’e nebe la furak ida. Moris ne’e a’at, a’at liu, tristi no tristi lahalimar". Se Ó husu karik hau diak ka lae, hau sei la hatan tamba hau nia hanoin mamuk, lian maran no hasan to'os.

Timor,

Ó fo ami inan ho aman, avo no bei-alan sira. Ó fo ami maun-alin, feton-nan. Ó fo ami maluk sira nebe hamutuk halibur iha rai ne’e, TIMOR-LESTE. Ó fo ami Rai no Ó fo ami Moris. Ó fo ami kondisaun moris nian, ba ohin no ba aban bainrua. O fo ami buat hotu.

Maibe, tamba sa, to’o ohin loron, iha ami nia moris, tempu ida ne'e, sei iha problema oioin, sikat iha foin sa’e sira nia le’et – in a broad daylight? Hau-ata la kumprende no la hatene tamba sa?, tamba saida?

Lolo'os ne’e ITA hatene, hare no tau-an, ema ida persija ema seluk, halo-maluk, halo-belun ho domin no iha domin nia laran. Hau ne’e iha tamba maluk sira ne’e mos iha. Los duni katak Ó fo belun diak ida mai hau, maibe hau mos lakon domin balun husi hau nia uma-laran no maluk sira seluk, hirus malu (buras dadauk...). Se nune’e nafatin, sei fahe problema ne’e ba lubun-lubun ho idak-idak ninia problema.  Hau laran moras wainhira hare katak iha ema balun (ema seluk) hare malu diak tebes duke iha hau nia uma no hau nia rain rasik. Susar no sei la bele dunik.

Hau so sinti laran ksolok wainhira hau hamutuk ho sira, ema seluk ne’e. Tamba sira kumprende hau nia moris no hakarak fo tulun hau. Hau sinti isin kama’an tebes tamba sira lolo-liman, tane no fo mahun ba hau. Sira nia uma-laran nakonu ho espiritu kmaluk, dame no domin e hau sinti katak iha konfiansa no hakmatek ho sira, duke iha hau nia fatin

Iha hau nia uma, hau la bele ko’alia barak, nune’e mos iha hau nia rain rasik hau labele loko-an. Se hau loke ibun no halo-an, sira hakilar, si’ak no baku hau. Se hau halai sira duni, kaer, tuku-tebe no bele oho tan. Hau mesak, mesak loos! Iha hau nia uma sorin, laiha maluk para halimar, iha eskola mos hanesan deit, nune’e mos iha fatin sira seluk.

Buat sira ne’e hotu, halo hau nia ulun moras, isin maten hotu. ITA labele halo buat ida tamba sira la fo fatin, la fo tempu no laiha biban. Hau hanoin atu sai, la'o ba rai-seluk... maibe hakat-ba sinti todan. Moris ne'e hale’u hau, sulan metin iha luhan "prizaun psikolojiku" nia laran – “penjara mental”.

Timor,

Tulun hau, liuliu hametin hau nia domin no fo kbi’it ba hau. Fo forsa mai hau para bele tahan-an iha moris. Hau hanoin katak hau iha tamba sira iha, begitu sebaliknya. Hau persija sira tamba hau la bele moris mesak nune’e. Hau dehan ba Ó, Timor, katak hau hadomi tebes Ó maibe hau nia laran moras, hanoin mamuk no kbi’it laek tiha ona. Hanesan vidru ida nebe hare borus husi sorin ba sorin, isin laiha, klamar mos laiha. Kbiit mos laek....!

Hau hanoin katak iha loron ida hau sei ba vizita Ó nia Knua, iha Webiku no Wehale neba. Hau iha vontade, laran kaman tebes atu hakat ba Uma Lulik, hodi harohan no hamulak, husu lia no kasu sala. Hau persija naroman no kbi'it, hodi leno-an, hatene hau-ata no hau nia moris. Tamba sa mak nune'e no oinsa loos hau nia moris ne'e?

Timor,

Ne'e sentimentu halerik husi O nia oan doben 
Mau Bui Bere, ho hakraik-an, husu dalan-sai,  orientasaun. Hau nia isin malirin, maten no namlaek, la hatene atu halo lo'os saida no atu ba lo’os nebe? Hau lakon, hau ta’uk!

Timor,

Tulun hau!

Oan,
Mau Bui Bere
Horizonte, 06/02/2001

Sem comentários:

Enviar um comentário

Publicação em destaque

"ÉS VIVA"

"És viva" A todas as mulheres Estás triste, Estás só Porque ninguém te fala Porque ninguém te liga Ninguém quer saber d...