DISKURSU HOSI SUA EXELÉNSIA
PREZIDENTE TAUR MATAN RUAK
IHA KOMEMORASAUN BA ANIVERSÁRIU KRIASAUN FALINTIL NIAN BA DALA 40
Tasi Tolu, loron 20 fulan-Agostu tinan 2015
 |
| Presidente Republika Taur Matan Ruak |
Militár sira.
Veteranus sira Falintil nian.
Povu doben Timor-Leste!
Ho haksolok boot mak ha’u iha onra atu prezide festa tinan 40 ba konstituisaun Falintil nian ida-ne’e.
Ha’u sauda Ita-Boot sira hotu ne’ebé marka prezensa, no ha’u fó-benvindu ba ilustre konvidadu sira hosi rai-belun sira ne’ebé hakat tasi hodi mai halibur iha ita-nia festa, señor Almirante Ray Griggs hosi Forsa Defeza Austrália, no señor Jenerál Ci Guowei, hosi Ezérsitu Populár Libertasaun Repúblika Populár Xina nian.
Ha’u sauda mós delegasaun Veteranu sira hosi Austrália, Japaun, Guiné Bissau, Serra Leoa no Sudaun Sul. Vizita hosi veteranu sira-ne’e fó haksolok boot ba ita.
Tinan haat-nulu sai nu’udar marku importante ida: iha ema sira-nia moris no mós iha instituisaun sira-nia moris.
Ohin ha’u hateke ba Falintil-FDTL no ha’u haree instituisaun ida ne’ebé nakonu ho orgullu, iha renovasaun lalais, ne’ebé hateke ba futuru ho konfiansa, sein haluha kona-ba lisaun sira istória nian.
Falintil-FDTL sai nu’udar instituisaun estadu Timor-Leste nian ida ne’ebé antigu liuhotu.
Tinan 40 liu ona, bainhira Falintil moris, ita hakat-liu momentu sira ne’ebé iha perigu boot. Nasaun timoroan nian hasoru krize ida hosi krize sira hotu ne’ebé grave liuhotu iha ita-nia istória.
Hamosu Falintil signifika organiza timoroan sira atu hasoru ameasa sira no prepara asaun ida aas liuhotu ba sidadania timoroan nian—Proklamasaun Independénsia ne’ebé ninia aniversáriu ba dala 40 ita sei komemora mós iha tinan ida-ne’e.
Ha’u hakru’uk ba memória Francisco Xavier do Amarak nian, nu’udar saudozu líder Proklamadór. Bainhira proklama Independénsia, Francisco Xavier do Amaral nia lian hato’o espresaun kona-ba ita-nia povu nia sentimentu no vontade sidadania.
Organizasaun Falintil kria kondisaun sira ne’ebé foun hodi enkuadra sidadaun sira-nia partisipasaun atu halo defeza ba rai doben Timor no hamutuk ho ita-nia komunidade.
Hamosu Falintil sai nu’udar manifestasaun ida ba vontade nasionál. Povu nia adezaun ba Faliuntil sai nu’udar espresaun determinasaun nian ida hosi timoroan sira ba vontade partisipasaun, hodi hatan ba líder sira-nia apelu, atu halo defeza ba ita-nia rain.
Ha’u hakru’uk ba mártiriu sira-nia memória, feto no mane sira nia memória ne’ebé fó sira-nia vida ba sobrevivénsia Nasaun nian no mós ba servisu Falintil nian.
Ha’u hato’o onra ba mémoria saudozu Nicolau Lobato nian, nu’udar Falintil nia aman no mós timoroan sira-nia nasionalizmu. Ninia ezemplu ba lideransa, matenek no mós ninia memória sai nu’udar ahi-lakan ne’ebé fó-roman ba Rezisténsia nia dalan no mós tulun ita atu hetan vitória, hafoin tiha funu durante tinan 24 nia laran.
Ha’u hato’o hako’ak boot no kmanek ida ba ha’u-nia maun Xanana Gusmão, ne’ebé troka Nicolau Lobato no orienta Falintil ho susesu no mós Rezisténsia tomak to’o povu nia vitória.
Hosi nia ezemplu, iha momentu sira ne’ebé importante iha ita-nia istória, no hosi kapasidade lideransa, Xanana Gusmão sai nu’udar aman fundadór ida ne’ebé loloos ba Timor-Leste. Ninia vizaun—molok no hafoin tiha independénsia—harii iha baze polítika rekonsiliasaun, pás no estabilidade ne’ebé ita-nia rain no ita-nia povu adota no implementa ho deteminasaun boot no ho fuan nakloke.
Falintil no Rezisténsia defende bebeik diálogu atu hetan pás iha ita-nia rain no ita-nia povu nia seguransa. Ita luta bebeik ba pás.
No ohin loron Falintil-FDTL serbisu atu hametin pás no tulun ba nasaun nia konsolidasaun no estabilidade.
Aniversáriu Falintil nian ba dala 40 sai nu’udar momentu adekuadu ida atu hato’o omenajen ba líder másimu Rezisténsia nian no fundadór Timor-Leste independente, Kay Rala Xanana Gusmão, no manifesta rekoñesimentu Nasaun nian ba nia.
Ha’u hako’ak ita-nia rain nia eroi deskoñesidu sira hotu, maun-alin inan-feton sira hotu ne’ebé serbisu ba vitória no kontribui ba Independénsia.
Ha’u hako’ak partisipante sira hotu iha Frente Armada, Frente Klandestina no iha Frente Diplomátika.
Sira-nia korajen no servisu hamutuk mak halo sai posivel hodi lori Nasaun hetan vitória, hamosu nasaun ida no asegura ita-nia komunidade nia sobrevivénsia, ita-nia kultura no ita-nia tradisaun sira-nia sobrevivénsia.
Barak sei kontinua serbisu atu hametin Timor-Leste. Ha’u hako’ak ha’u-nia maun sira: José Ramos-Horta, Mari Alkatiri no Francisco Lu-Olo. Ha’u hanoin kona-ba saudozu alin Fernando La Sama de Araújo ne’ebé husik hela ita sedu tebe-tebes.
Falintil nia susesu iha tanba eroi no mártiriu barak—entre sira barak, hanesan irmaun Ma-hudu, Nino Konis Santana, David Alex Daitula, no Ular.
Barak kontinua hamutuk ho ita no kontribui hodi harii Falintil-FDTL no konsolida nasaun—inklui komandante eróiku sira hanesan ha’u-nia maun-alin Lere Anan Timur, Ma’hunu, Sabika, Aluk Descartes, Falur Rate Laek, Trix, Maunana, Maubuti, Maukalo no sira seluk barak ne’ebé serbisu atu defende soberania nasionál no estabilidade.
Líder no komandante sira sempre hetan apoiu hosi militár no sivil sira rihun ba rihun. Eroi deskoñesidu sira-ne’e nia kontribuisaun sai desizivu ba vitória.
Iha komemorasaun tinan 40 Falintil nian, ha’u hakarak, hodi nasaun nin naran, hanoin kona-ba memória ba nasionalista sira hotu, ne’ebé mate ba rai doben Timor nia liberdade—militár no sivil sira. Ha’u hakru’uk ba memória saudozu líder no komandante sira barak: membru sira hosi Komite Sentrál Fretilin, adjuntu sira Komité Sentrál nian, Komandante Setór sira no Brigada sira no saudozu maun-alin inan-feton sira hotu ne’ebé mate iha ofensiva violenta kontra baze apoiu sira no kombate sangrentu sira seluk, durante tinan 1980 no 1990 nia laran.
Falintil nia susesu iha tanba ema hotu. Família timoroan sira hotu halo tiha ona sakrifísiu. Kuaze família sira hotu lakon oan doben sira. Kuaze Timoroan sira hotu hasoru perigu no tulun halo istória ne’ebé lori ita ba Restaurasaun Independénsia.
Verdadeiramente, ema ida-idak, sai nu’udar istória ida. Serbisu ho nonok ema rihun ba rihun nian hosi eroi deskoñesidu sira, iha unidade nia laran ho líder sira, mak tulun hodi manan Falintil no Nasaun nia vitória. Nasaun rekoñese no hetan onra hosi kontribuisaun no sakrifísiu hosi veteranu sira. Ita tenke fó impulsu foun ida no dezenvolve prosesu rekoñesimentu, ho rigór no ho lia-loos. Ha’u renova ha’u-nia apelu ba veteranu sira atu kontribui hodi tulun klarifika situasaun sira ne’ebé hamosu dúvida, hodi nune’e governu bele rezolve kazu sira ne’ebé pendente. Ha’u haree ho preokupasaun katak prosesu ne’e kontinua la’o kleur. Difikuldade sira ne’ebé eziste tenke supera ho Justisa no rigór.
Militár sira. Povu Timor-Leste.
Forsa armada kontinua hala’o renovasaun ba jerasaun sira. Aniversáriu ida-ne’e duni marka ho pasajen militár distintu na’in 27 ba reforma, ho karreira sira ne’ebé onroza iha gerilla Falintil nian no ne’ebé integra iha F-FDTL to’o ohin loron.
Iha tinan 15 nia laran ikus ne’e, militár esperiente sira-ne’e serbisu ba transformasaun Falintil ba Falintil-FDTL. Sira transmiti esperiénsia, prinsípiu no valór sira Falintil nian ba soldadu foun sira.
Iha momentu ne’ebé militár sira pasa ba reforma, ha’u hakarak manifesta rekoñesimentu nasaun nian ba sira publikamente tanba servisu no dedikasaun hanesan militár.
Agora, mak termina ho onra sira-nia karreira militár, ema sira-ne’e merese hetan apoiu iha sira-nia integrasaun ba vida sivil. Sira sei iha kontributu atu hato’o ba nasaun.
Ita-nia forsa kontinua rekruta no treina soldadu foun sira. Atu hatan ba dezafiu foun sira, ita tenke hetan lisaun sira istória nian.
Valór sira ne’ebé aprende durante funu sai nu’udar Nasaun nia riku-soin no nu’udar institiuisaun militár nia patrimóniu ida. Kbiit hosi valór sira-ne’e mak lori ita ba Independénsia nia vitória:
Falintil nia lealdade ba povu;
Povu nia konfiansa ba iha Falintil;
Unidade entre militár no sivil sira;
Espíritu servisu ba Nasaun, dedikasaun ba servisu bodik ba moris-di’ak ema barak nian.
Nasaun kontinua presiza valór sira-ne’e atu alkansa vitória sira ne’ebé foun.
Militár sira. Maun-alin no inan-feton sira.
Funu tinan 24 nia laran hakat liu derrota no vitória. Iha debate atu adapta Rezisténsia no Falintil nia estratéjia hasoru dezafiu sira okupasaun nian, ne’ebé evolui ho tempu.
Livru sira hotu mundu nian, universidade sira hotu mundu nian laiha resposta ba Rezisténsia nia problema sira. Ita mak tenke deskobre estratéjia foun no solusaun sira atu garante Falintil, Rezisténsia no povu nia sobrevivénsia.
Vitória sai posivel tanba komportamentu hosi sira ne’ebé reziste—iha ai-laran, iha sidade laran, no iha to’os no natar laran sira.
Iha mós sira ne’ebé deziste. Maibé vitória ne’e sai nu’udar rezultadu hosi esforsu no sakrifísiu hosi sira ne’ebé luta no la deziste.
Povu no Falintil nia vitória hamosu nasaun ida ba Timoroan sira hotu. Laiha ema ida maka eskluidu. Maibé Nasaun nia admirasaun hato’o ba sira ne’ebé reziste no proteje povu. Nasaun nia admirasaun hato’o ba sira ne’ebé la deziste.
Restaurasaun Independénsia sai posivel tanba iha unidade ida ne’ebé loloos entre povu no kombatente sira, hodi halo servisu ba Nasaun.
Lisaun ida-ne’e kontinua sai importante, iha prezente no ba futuru nasaun nian. Presiza atu hametin unidade, no hametin konfiansa povu nian ba instituisaun sira, sivil no militár nian.
Maun-alin no inan-feton sira.
Serbii nasaun durante tinan 36 nia laran iha Falintil no iha Falintil-FDTL sai nu’udar onra boot ida ba ha’u-nia vida. Sai nu’udar onra ida ba ha’u atu hahú no lidera prosesu transformasaun forsa gerillia Falintil nian ba forsa militár moderna, ne’ebé iha kbiit atu hatan ba nasaun nia nesesidade foun sira.
Falintil-FDTL hala’o tiha ona progresu sira ne’ebé importante. Iha sevisu ida-ne’e, ita hetan apoiu militár hosi rai belun barak. Ha’u agradese parseiru sira hotu ba kooperasun militár tanba sira-nia asisténsia, sira-nia partilla esperiénsia no sira-nia amizade.
Oras ne’e, Falintil-FDTL nia kombate prinsipál maka dezenvolve no aumenta kompeténsia téknika no profisionalizmu atu kumpri ninia misaun konstitusionál sira hodi garante independénsia, integridade territoriál—iha rai-maran no iha tasi— liberdade no mós populasaun nia seguransa.
Bainhira sai Prezidente Repúblika ha’u nunka haluha kona-ba lisaun sira ne’ebé Falintil fó mai ha’u no fó ba Nasaun.
Konfiansa povu nian ba militár sira, no protesaun ne’ebé povu fó ba kombatente sira, sempre sai nu’udar fonte no abut ba Falintil nia kbiit—no vitória nia segredu.
Mane no feto sira Falintil-FDTL nian tenke estuda no labele haluha lisaun ida-ne’e.
La ho konfiansa povu nian, la ho unidade Nasaun nian, militár sira laiha kondisaun atu kumpri misaun sira ne’ebé nasaun husu ba sira atu hala’o.
Ba jerasaun sira militár nian ne’ebé foun, ha’u hatete: benvindu mai Falintil-FDTL.
Estuda lisaun sira hosi ita-nia istória rasik. Serbisu ba hodi aumenta konfiansa hosi povu ba militár sira, ho profisionalizmu no espíritu servisu ba nasaun.
Liuhosi imi-nia ezemplu, dedikasaun no rigór, tulun nasaun atu hakat ba dook liután!
Onra ba Falintil. Onra ba Eroi sira. Viva Falintil-FDTL.
Husu boot Maromak fó-bensaun ba imi hotu no imi-nia família sira no fó-bensaun ba Timor-Leste.
Obrigado Barak!
http://presidenciarepublica.tl
Sem comentários:
Enviar um comentário