Mensajen Presidente Comité 12 de Novembro bá komemorasaun loron nasionál juventude, 12 de Novembro 2015 ( bá maun-alin sira iha rai liur )

Maluk Timor oan sira, li-liu Mate Restu 12 novembro sira iha rai liur !! 

Ohin ita tama bá komemorasaun tinan dala 24 hodi hanoin hikas no fo’o onra bá jovens Lorico Asuwa’in sira ne’ebé hamrik ho aten brani hakilar hakarak ukun rasik ‘an iha 12 de Novembro 1991. Ohin ita hakruk hodi halo um minutu de silêncio hodi fo’o onra bá sira hotu ne’ebé mate ona tamba hakarak ukun rasik ‘an, li-liu sira hotu ne’ebé mate iha 12 de Novembro 1991. 

Movimentu 12 de Novembro nudar símbolu unidade nasionál no prova determinasaun juventude Lorico Asuwa’in sira bá ukun rasik ‘an, hasoru jakarta ho nia militar sira. 

- Símbolu unidade nasionál ne’e maka tenki sai lalenok bá ita hotu, inkui maluk sira hotu ne’ebé oras ne’e hela iha rai liur. Ita mai husi suku ho dálen oi-oin, serbisu iha fatin la’hanesan, iha organizasaun no partidus polítus oi-oin, iha fiar bá maromak mos la’hanesan, maibe ita ida deit mesak ran povu Timor Leste nian. Tamba ne’e ita hotu tenki hadomi malu hanesan maun ho alin. 

- Prova determinasaun ne’e maka tenki sai exemplu bá ita hotu atu lao tuir. determinasaun atu aprende nafatin hodi hetan matenek no determinasaun atu badinas serbisu ho sakrifísiu, disiplina no responsabilidade. determinasaun atu hadók ‘an husi hahalok kontra léi ne’ebé vigora iha fatin ne’ebé ita ida-idak hela bá. 

- Joven sira laós deit sai esperansa bá futuru maibe, sai mos ajente prinsipál hodi halo mudansas, hahú husi loron ohin, tamba loron ában hahú ohin !! 

- Jovens sira tenki brani hado’ok ‘an husi tua manas, sigaru, droga no violénsia, tamba timor leste precisa nia jovens sira ne’ebé iha unidade metin, isin forte no matenek hodi halo serbisu ho kualidade. obrigadu barak no hakuak bo’ot.

Díli, 12 de Novembro de 2015.

Gregório Saldanha (Mouris) 

P r e s i d e n t e

COMITÉ 12 DE NOVEMBRO

Rua Balide, ex-.Edifício Comarca/CAVR Díli Timor Leste

Telefone : 7346365, 7393839, 7288541