BEM VINDO E OBRIGADO PELA VISITA!

domingo, 1 de abril de 2018

Sira dehan, "Xanana haki'ak koruptor", Dionisio ho Akara dehan "nonsense", no Dalia sublinha

Boa disposição na companhia
de Mericio Akara e Dionisio Babo Soares
Klima tropika Eleisaun Antesipada "cada vez mais excitante", halo ita mos "nakdedar" ka'an halo "propaganda" no hakilar "viva" ho lian a'as. Ida ne'e mak hau sente iha hau nia primeira prezensa "em ação" iha aktividade politika nebe AMP Oxford organiza. Privilegio ida ba hau, nudar estreante, rona no observa ho atensaun aula politica husi excelencia companheiro Dinisio Babo no belun Mericio Akara. Sirua mai lori-ho "ideias construtivos, objetivos no propostas aliansas" hodi lo'ok ba militante, simpatizante no bainaka sira iha "uma-fukun" AMP Oxford nian. Foi particularmente impressionante! 

Iha sorumutu "biti-bo'ot" ne'e hotu-hotu "futu-lia" metin, ida deit, hodi dehan "sim, AMP metin" hamutuk ho Maun Bo'ot Kay Rala Xanana, Maun Taur Matan Ruak no Belun Naimori Bukar. Lia-menon prinsipal ba konsolidasaun mos hato'o ho forma instrutivu tebes husi exelensia sira nia intervensaun. Tematika "Hamutuk Hametin Nasaun" hakloran metin ho slogan "Fiar An La'o ba Oin", "Hisik Kosar ba Moris Di'ak" no "Tane O Ema, Tane O Rai, Tane O Lisan". O evento foi considerado um sucesso e esclarecedor" kona ba programas no duvidas hirak nebe mak sirkula da'et ho "korrupsaun" no "governasaun tinan 10". 

Iha apontamento ida ne'e sei rezumu issue balun konaba korrupsaun (sani: sistema judisial) konfronta ho "uma-sorin" sira nia propaganda. Anexa ho "copy and paste" Xanana nia esforsus halo leis no hari instituisaun hodi hamate tiha ema sira ho karakter corruptos no criminal.

Iha intervensaun solene Dioniso Babo no Mericio Akara oportunamente fundamenta katak korrupsaun ne'e crime e nia konsekuensia hela-ba  ida-idak nia responsabilidade, individual la'os koletivu. 

Hanesan tenik Akara iha nia esplikasaun katak "Korrupsaun ne'e aktu individual. Se'e ma'ak hanoin komete krime ka na'ok aban bain rua sei hatan ba justisa, tamba ne'e ma'ak barak tama ona hotel Becora ho Gleno. Nune'e duni propaganda husi vizinhos sira dehan «AMP haki'ak korruptor» ne'e bosok".

Atu dehan ho forma seluk katak ita nia sistema judisial hahu'u fo-hakat kedas iha IV Governo Constitucional, iha era Xanana nian, no dadauk sistema montada la'o no funsiona hela no sei hamentin liu tan iha futuru.

Nudar Primeiro Ministro iha tempo neba, ho preokupasaun ba crime nebe'e ma'ak envolve ukun-na'in no "pejabat" sira, ho matenek, Xanana foti "medidas de prevenção", hari instituisoes sira hanesan KOMISAUN FUNSAUN PÚBLIKA, KOMISAUN ANTI KORUPSAUN, POLISIA CIENTIFICA INVESTIGASAUN KRIMINAL, INSPESAUN JERAL ESTADU, KOMISAUN APROVISIONAMENTU, ho Parametrus leis seluk ligadu ho prosesu Konstrusaun Estadu, inklui Lei Kodegu Prosesu Sivil no Penal, Lei Orsamentu no Jestaun Finansas Públika, Lei Seguransa Sosial, Leis Expropriasaun, Lei Kodigo Trabalhu no seluk-seluk tan. 

Iha tempo "consulta popular" ba Planu Estratejiku Dezenvolvimentu Nasional (PEDN) iha Bazartete, 10 Agustu 2010, Xanana Gusmao afirma nia commitment no vontade politika hodi satan hasoru no kaer "oportunistas corruptos" sira. Iha biban neba, Xanana promete no assume dehan: "Atu kombate korupsaun ne’ebé agora ema barak koalia, Estadu hahu monta dadaun sistema hodi harii dadaun Komisaun Funsaun Publika, Komisaun Anti Korupsaun no agora dadaun Governu liu hosi Ministeriu Justisa halo hela memorandum entendimentu ida ho Governu Portugal atu harii Polisia Investigasaun Kriminal, atu iha loron ida bele lori ema sira ne’ebe halo korupsaun ba kadeia".

Iha video share iha media sosial facebook hatudu prova ida-tan katak Xanana laiha tempo ba retorika, tamba atu kombate korupsaun la'os kolia deit, em jeito, para ema atu dehan katak ita mak defensor ba anti-korupsaun maibe la hatene atu  halo saida hodi promove "boa governasaun", exclusivamente, hodi prevene no "avante" hasoru KKN.

Parte ida nebe bele halo "ema balun" isin "katar" no alergico quando Xanana dehan iha video share: "Hau husu boot, ita hotu defende to'ok "Komissaun Anti Korupsaun", atu hare to'ok buat sira uluk-uluk, uluk-uluk sira ne'e hotu ita bo'ot sira simu husi nebe, ita bo'ot manan deit 200 dolar e hetan fali buat ida ne'eee? Tamba ne'e Komissaun Anti Korupsaun tenki la'o".



Xanana nia "contrato politico" fo-fuan barak ona, ou seja, rezultadu mak ita hare ema sira pratika KKN ka halo crime lubuk ida mak sulan tiha ona ba kadeia Becora no Gleno, balun antri daudauk no seluk sei iha hela prosesu investigasaun. 

Ho prosesu tomak relativa ba kazu korupsaun, de facto, hetan kritika wai'n husi sosiedade no fila-fila adversario sira uza nudar trunfo hodi doko governo (Xanana ho AMP tinan 10 nian). Topico ne'e mos sai argumento estrategico ba adversariu politiku sira hodi kehe-ahi propaganda iha vespera Eleisaun Antesipada. Sira dehan katak "resultado governasaun tinan 10 nian ma'ak korrupsaun", maibe, AMP dehan "lae, ne'e propaganda laiha fundamentu", tamba konsidera korrupsaun ne'e aktu indivual no prova ona katak governo Xanana ho serio monta sistema no halo leis hodi kaer no sulan "corruptores" no "criminosos" sira ba "gaiola". 

Ba ida ne'e, ita hotu konkorda katak Xanana la'os koalia deit, maibe halo no kumpri duni nia promesa.  Firme iha komitmentu, profesionalismu no responsabilidade. 

Iha media sosial hau simu lian-litik barak husi vizinhos sira konaba kazu korupsaun.  "Mana Dalia dehan to'ok Ministro husi Partido Fretilin nebe ma'ak oras ne'e dadauk tama ona iha BECORA?" 

Ba litika ne'e, hau hanoin katak sira "soe-lia" tamba iha sira nia "ignoransia", dala ruma, ho pensamento katak corruptor no criminoso sira ma'ak ema sujeito husi Partido CNRT deit, nune'e sira hakilar bebeik "Xanana mak haki'ak corruptor ka criminoso sira". Hau foti kazu Rogerio Lobato no Nelson Santos nian. Ida, infelizmente hau nia tio rasik tamba crime cometido, hanesan notisia iha jornal Esquerda hakerek ho titulu "Timor: Rogério Lobato condenado a 7 anos de cadeia". Rua, Nelson Santos envolvido iha krime korupsaun, hanesan publika iha blog "O EÇA" ho titulu "Nelson Santos sob investigação, sobrinho de Manuel Abrantes, suspeito de peculato". Sei iha seluk tan, maibe ne'e hela ba leitor sira nia t.p.c. 

Iha ne'e, ita koko kontra faktus maibe argumentu rasik laiha, sa-tan ita lamas tun-sa'e evidencias ho teoria oioin hodi sustenta dei't ita nia teimosia. Enfim, como diz um velho ditado "contra factos não há argumentos".

Privilejiu seluk nebe hau apresia tebes iha encontro AMP Oxford ho  aprezentasaun husi delegado AMP sira husi Bristol, Peterborough, Crewe, Scunthorpe, Bridgewater, nebe, ho forma exemplar afirma sira nia comitment no total apoio ba trio Xanana-Taur-Naimori hodi continua ho mega projeto PEDN design husi governu anterior iha tinan 10 mai ne'e. Konaba kritika "governo Xanana tinan 10 la halo buat ida", hakerek-na'in sei partilha iha biban tuir mai ho apontamentos balun.  

Fila hikas ba tema korupsaun, hau hakarak termina hodi dehan katak korupsaun ne'e kronika ida, nia sai obstakulu bo'ot ba dezenvovimentu nasional no  fenomeno ida ho consequensia negativa ba vida sosial no ekonomiku. Atitude ilícita KKN mos prejudicial ba  "estado de saude" ita nia rain nudar Estadu Direitu Demokrátiku. 

Sira dehan, "Xanana haki'ak koruptor", Dionisio ho Akara dehan "nonsense", no hau sublinha, "ema sira iha Becora no Gleno bele sai sasin ba Xanana nia politika no determinasaun hodi kombate KKN". Hau sadik leitor sira nia lojika "iha ne'e, se los mak haki'ak koruptor?".  Pista ida mak ne'e "Xanana halo leis, kria instituisaun no lulun ema lubun ida ba kadeia". Pista seluk hela ho pergunta "sera que vizinho sira mak haki'ak koruptor?" Eis a questão!

Atu hametin ideia hau fiar katak Timor-Leste sei supera dezafiu hirak nebe preocupante em prol ba Libertasaun Nasional.

Apontamentu ida ne'e rezultadu husi obeservasaun badak iha familia AMP nia magna encontro iha Oxford, England, nebe, hotu-hotu considera educativo no esclarecedor, ho ênfase crime korupsaun. 

Hau-ata, apresia no agradece fuan ho laran ba maun bo'ot rua, representante ofisial AMP, Dionisio Babo Soares (CNRT) no Mericio Akara (PLP), nia tempo hodi fahe informasaun no conhecimento "realpolitik" iha ita nia rain.

Obrigada mos ba leitores sira nia tempu sani hau nia apontamentus ne'e, hein katak sei iha tempu nafatin hodi visita hau nia portal www.kiakilir.blogspot.com, tamba hau sei hakerek kona ba "desenvolvimentu tinan 10" nebe'e vizinho sira dehan "la halo buat ida".

Mission accomplished!

Buibere-oan, Dalia Kiakilir
Oxford, 01 de Abril 2018

Sem comentários:

Enviar um comentário