20 DE MAIO Konvida Ita Hotu Ba Oxford

20 DE MAIU Konvida Ita Hotu Ba Oxford

Ukun-an dala-ida de’it, laiha-tan dala-rua, sa-tan dala-tolu!

Oxford, BK, 13 Maiu 2019

Tinan ida ne'e, 20 Maiu 2019, sei komemora, dala-ida tan, loron istoriku Restaurasaun Independensia Timor-Leste, destavez ba dala-17. Iha Timor-Leste, iha rai seluk timor-oan tomak sei la haluha loron celebre ne'e. Nunemos iha rai Inglatera timor-oan sira hahi’i, hana’i nafatin aswain Libertação da Pátria sira.

Atu hahi'i loron ne'e, timor-oan sira iha Inglatera sei halibur hamutuk iha sidade Oxford iha loron 18 Maiu  ho "espitiru restaurasaun" hodi hanoin hikas no reflete konaba Timor-Leste nia istoria luta nebe hahu iha loron invazaun militar Indonesia, 7 Dezembru 1975, to'o restaura hikas iha loron 20 Maiu 2002. Tinan 17 ona ma’ak Timor-Leste uja no goja nia plenu direitu nudar Estadu Direitu Demoktatiku, Soberanu no Independente.

Tinan kotuk, 2018, Northwich & Winsford ma’ak organiza aniversariu Restaurasaun Independensia ba dala-16, i tinan ida ne’e, 2019, estafeta entrega ba Oxford. Motivadu ho valor historico, community mau-buibere iha sidade ki’ik no charmosa ne’e hahu inisiativa hari'i Komisaun Organizadora (KO) ba eventu 20 MAIU no Acacio Marques, aktual chefe komunidade timor-oan sira iha Oxford, ma'ak simu konfiansa hodi kaer kna’ar nudar Koordenador Jeral. Iha dokumentu nebe ma'ak Blog Kiakilir hetan asesu, Komisaun Organizadora prepara “festa” ho aktividade sira hanesan; Torneio Tebe-Bola, Espetáculo Cultural no seluk-tan, nebe sei akontese iha loron Sabdu, 18 Maiu 2019, husi tuku 10.00am to'o tuku 01am, ho fatin iha Cheney School, Cheney Ln, Oxford OX3 7QH.

Iha dada-lia ho membru balun husi KO (Red.) hatene-los katak "tinan ida ne'e Oxford mak sai uma-na'in ba loron importante ne'e no destaque ba estreia, pela primeira vez, Komisaun assumi responsabilidade ba "evento de grande dimensão" nebe hetan mos pertisipasaun husi grupu kompatriota sira husi fatin seluk, hanesan Irlanda Norte nian no seluk tan".  

Komisaun Organizadora, liu husi karta konvite, apela ho hakraik-an ba komunidade timoroan sira hotu atu kontribui no partisipa iha loron memoravel ne'e, ne'ebe tuir dadus "la ofisial" dehan katak numeru timor-oan sira iha Oxford sura hamutuk rihun ne'en resin (+/- 6 mill pessoas). 

Konsidera momentum heroiku, Blog Kiakilir, faz questão, fo hanoin "mai ita hotu", neon-ida hamutuk hanoin-hikas no presta homenajen ba funu-nain no aswain sira ho lian a'as no tegas dehan “viva Timor-Leste”.

“A independência de Timor-Leste, proclamada pela Frente Revolucionária do Timor-Leste Independente (FRETILIN) em 28 de Novembro de 1975, vê-se internacionalmente reconhecida a 20 de Maio de 2002, uma vez concretizada a libertação do povo timorense da colonização e da ocupação ilegal da Pátria Maubere por potências estrangeiras.” – in Preambulu Lian-inan K-RDTL, versaun Portugez.

Viva 20 Maiu

Viva Timor-Leste

Editor Blog Kiakilir

Oxford, 13 Maiu 2019