Tamba Sa Mak Tenki Kumpri Regras Estadu Emerjensia? - Hanoin Balun

Virus Corona ka COVID-19 sidauk iha nia kura. Akompanha informasaun husi World Health Organization (WHO), virus ne’e oho ona ema liu 31.000 iha mundu tomak ho infektadus ka kazu pozitivus ma’ak liu ona 650.000, no lorloron notisia global fo-sai dadus ho numeros nebe aumenta ba bebeik.

Ita Timor  oan balun nia mentalidade ten-ki muda. Keta hanoin deit ita ne’e diak hela deit. Sadar katak ita nia karakter ne’e por natureza difisil atu muda tamba por norma mentalidade wainhira hanoin “hanesan ne’e, tenki hanesan ne duni”

Ho virus ne'e  ita persija KUIDADU EXTRA. Mundu alerta konaba ba Estadu  Emerjensia ka Lockdown. Tamba sa mak tenki aplika regras hodi DISTANSIA malu?

TAMBA NE'E BA ITA EMA NIA PROTECÇÃO NO BA MUNDO TOMAK!

Ordem husi WHO ne’e ho karakter MANDATORIO. La’os de’it  HIGIENE, fasi liman ka uza maskara no luvas, maibe DISTANSIA SOSIAL no self isolation mos importante atu ajuda prevene transmission ba moras ne’e.

EXEMPLU DESKUIDU

1. Usa maskara la uza luvas. Sai ba liur liman kaer odamatan ka kona buat ruma nebe infektadu no  transmite liu-husi liman ba oin (matan, inus no ibun).

2. Publikasaun imajen ida iha facebook konaba aniversario hatudu DESKUIDU seluk ida. Iha selebrasaun ne’e ema hotu uza maskara maibe aniversariante tenki hasai maskara hodi hu lilin iha cake ka bolu. Signifika, ida hu lilin ne’e, se karik contaminado, entao sira nebe han bolu nemos apanha hotu virus.

KUIDADU

Maluk sira, hanoin antes halo buat ruma, karik ita nia hahalok bele afekta ema seluk. Virus ne’e wainhira tama ita, ita la sinti nia reaksaun imediatamente. WHO dehan katak iha 14 to 30  days of Incubation period. Ita bele hanoin katak ita di’ak hela, por enquanto, maibe ita nunka hatene tamba sintomas covid-19 lori ate fulan ida atu hatudu nia reasaun ka ita foin sinti moras ne’e iha ita nia isin.

Hanoin rasik ba. KUIDADU nafatin, PROTEJE ema hotu no ita nia a’an! Tamba, ema 1 bele afekta ema 10, ema 10 bele afekta ema 100 no ema 100 bele afekta 1000 no kontinua...

ATENSAUN ba superficie commercial/shopping

Loja na’in presija aplika regras, hanesan pais balun halo ona.

1. Limita numero ema tama iha loja laran (maximu ema nain 10 mak tama)

2. Iha loja liur, ema sira nebe hein antri hamriik iha linha ho distansia minimu metro ida.

3. Ema 2 de’it mak bele halo kompras ka shopping ba familia (household).

4. Kliente sira loja laran komesa sai ona mak fo fatin ba sira seluk tama.

5. Simu card payment only

KEY WORKERS

1. Servisu Saude

2. Loja fa’an ai-han no toiletries

Fatin merkadu autoridades tenki kontrola nia konsidaun no movimentu ka taka.

Konaba sustentabilidade moris, hau hanoin karik diak, Governu bele fo exepsaun la selu taxa, no fasilita ema hotu iha asesu ba eletrisidade ho bee-mos gratis i nunemos prepara atu distribui foos no ai-han seluk ba komunidade sira.

Iha Inglaterra,  Liurai, Primeiro Ministro, Xefe Saude no sira balun iha Parlamento mos infektadu ona, sa tan ita ki’ik no ki’ak sira.

FATIN KUARENTENA

Imajen balu sirkula iha media sosial hatudu kondisaun “la di’ak” KUARENTENA nian. Osan ba Estadu Emerjensia aprova tiha ona ho montante 100 milhões de dólares. Tamba ne’e, husu ba GUVERNU atu tau matan nafatin ba fatin Kuarentena no hadi’ak nia kondisaun.

MATAN MORIS NEON NA’IN!

Mai ita hamutuk tulun salva Mundu husi Corona Virus, hahu uluk salva-An, salva Familia no salva Timor-Leste.

KETA HALUHA

Korona Virus nia alvu prinsipal mak MATAN, INUS ho IBUN!

Dalia Kiakilir

Oxford, 29 Marsu 2020