.
Subscribe to my channel Youtube.com/user/DaLiaMuzic
TAMA LIU MAI BAINAKA SIRA, BEM VINDO E OBRIGADA PELA VISITA!

quarta-feira, 10 de agosto de 2016

PM Xanana Gusmao dehan: Alkatiri Labele Nega Fretilin Korruptor Boot Liu AMP

PM Xanana Gusmao
DILI – Primeiru Ministru Xanana Gusmao husu ba eis Primeiru Ministru no atual Sekretariu Jeral Fretilin Dr. Mari Alkatiri atu labele nega katak korrupsaun iha governasaun Fretilin nian boot liu governasaun Aliansa Maioria Parlamentar.

PM Xanana hateten ida ne’e, Tersa (12/05), liu husi konferensia imprensa, nebe maka akompanha husi Ministra Financas Emilia Pires, iha palasio governu.“Mari Alkatiri labele haluha katak governu Fretilin husik hela korrupsaun boot liu fali governu AMP. Se Alkatiri nega nia laos ema ona,” dehan PM Xanana.“Tanba uluk hau sei prezidente inprezariu barak ba hato’o ba hau dehan favor hato’o hela ba governu selu ami nia projeitu halo hotu ona maibe governu seidauk selu. Mais hau dehan ba Alkatiri atu selu tutuir osan sira nee, nia dehan diak- diak maibe la selu,” dehan tan Xanana.Maibe, nia husu mos ba ema lideransa Fretilin atu lori evidensia ba tribunal sekarik governu AMP halo korrupsaun.

Tanba, akuza ema arbiru deit nein laiha evidensia ne’e ladiak.“Hau dehan ona iha evidensia hodi ba tribunal, labele koalia deit hanesan manu inan ida atu tolun maibe ohin nia kokorek ba mai. Se tribunal informa hau, dehan hau nia membrus governu nee sala hau sei hasai nia, maibe se dehan nia los hau simu nafatin nia,” PM Xanana hateten.Xefe governu nee dehan, tuir lolos nia lakoi atu ke’e kazu korrupsaun nebe mosu iha Fretilin nia tempu, maibe Fretilin rasik maka hakarak kee rasik. “Ami dehan tiha ona katak konaba kotuk ita nonok tanba ita hakarak hadia ba oin, mais ami nonok foer mai fali, ita hotu tenki foti sai fali,” haktuir nia.

Alende ida ne’e, PM Xanana afirma katak Komisaun Anti Korrupsaun tenki hari atu nune’e bele halo kombate korrupsaun nebe maka mosu iha governu nia laran. “Hau husu ita hotu tenki defende KAK atu hare tok buat sira uluk –uluk nee hotu ita tenki hare nusa maka ema nee manan $200 dolar deit nia hetan fali buat ida nee, ida neba? nee ita sei lao ba atu hare tamba KAK sei loka dalan ba buat oin –oin,” dehan Xanana.

Tuir Xanana katak, durante nee nia rasik observa media fo sai kazu korrupsaun barak mosu iha ministeiru sira, maibe informasaun sira nee so doko deit publiku nia hanoin tamba la iha evidensia forti.“Dala ruma ami husik to buat nee tasak tiha maka ami hare oinsa maka bele hatan. Maibe ami durante fulan nen (6) nia laran nutusia sai barak dehan governu AMP korrupsaun mosu barak tebes. Mesmu hahu husi hau rasik to hau nia ministru sira ami hotu mesak korruptor deit,” Xanana responde.

Konaba kestaun korrupsaun, Xanana haktruir katak kritika hotu nebe hato ba nia governu ne’e nia simu. Tanba bele desperta konsensia povu ba problema boot korrupsaun atu nunee AMP bele hakasan nafatin hodi TL bele sai numeru primeiru kombate korrupsaun.Ba kestaun publika informasuan ka notisia ba publiku iha TL, tuir Xanana katak, media bele hetan naroman ba liberdade ona atu publika kazu korrupsaun hotu tanba uluk jornal ida labele publika arbiru kazu korrupsaun nebe mosu iha governu nia laran.

Maibe agora governu AMP fo liberdade ba media atu krika.“Debate publiku konaba korrpsaun nudar sinal diak, hatudu katak nasuan ida nee hader tiha ona. Uluk karik jornal ida labele koalia hasoru governu, ohin buat nee sai normal tiha ona ami orgulhu tamba liberdade imprensa iha tina ona,” dehan Xanana.Konaba salariu asesor internasional sira iha ministeriu financas nebe maka durante ne’e hetan kritika barak husi Fretilin, PM Xanana nebe hetan akompanha husi Ministra Financas Emilia Pires, hateten governu AMP lahasai osan povu nian hodi selu salariu asesor internasional. maibe, asesor kuaje nain 48 nee, hetan vensimentu husi prozeitu Public Finance Management Capacity Building Programme (PFMCBP), ne’ebe finansia husi doador ualu (8), iha sistema administrasaun Banku Mundial nian.

Tuir PM Xanana, preokupasaun husi reprezentante Parlamentu Nasional (PN) liliu husi parte Fretilin hanesan alegasaun falsu tanba realidade estadu la uza osan povu, lahanesan ho governasaun Fretilin iha antigu.PM Xanana nebe kompleta ho dokumentus boot ida iha nia liman, hateten, sira iha evidensia forte no dadus kompletu konaba mal administrasaun at liu husi governasaun Fretilin nian., liliu iha parte Ministeriu Finansas nebe lidera husi Maria Madalena Boavida.

“Ita rona deit hanesan nee, governu Fretilin iha 2007 fo 23 dias ba asesor internasional ida ho valor rihun $23 naran. nia sim um mil ba loron ida. mas la inklui iha despezas, han, hemu, alojamentu hanesan Otel, trasporte, buat hirak nee estadu mak selu hotu,”deklara nia.

Seluk fali iha Novembru 2006, 42 dias ba konsultan services ba fundus MCC nian ho vensimentu rihun $42. Ba travel nian maka rihun $11,77, lainklui tan toba fatin iha otel boot hanesan Sagres, venture no seluk tan. Xanana hateten, maibe, sira nunka buka atu lekar sai, hodi hein Fretilin duni mak abuza hodi sukit sai sira nia foer.Iha Marsu 2007, iha mos 16 dias ho rihun $16 kompleta expensive rihun $4300. “perdiem ba iha Bali kalan ida rihun $1. buat sira nee iha hotu. agora Fretilin responde tok. Dili airport arrived Viza, mos ita maka selu hotu. ida nee maka fulan-fulan hela deit. liliu ba Sr ida be MCC nian. mas nia la produz buat ida to’o AMP ukun tiha deit,”deklara mos Xanana.

PM Xanana rekonese falhansu balun agora dadaun konaba projeitu estrada nebe ladauk hadia remata, inklui programa preoridade seluk. maibe tuir nia, buat hirak nee relasiona ho devidas bara-barak husi governu anterior nian.“Sira iha devidas barak los, ne’ebe maka ami labele sura ida-idak. maibe kandu total deit entaun kuaje milaun $119.mas to’o Dezembru 2007, ami hili nebe mak ami tenke kontinua. no ba restu nebe falha, ami tau hotu iha kaisa,”deklara nia.

*Fonte Timor Post

Comentário : Victor Tavares*

Afinal ex-PM Fretilin nian bosok teen. Nia hakarak atu defende nia governo no atu subar metin ninia ministra finansas halo korrupsaun boot liu, maibe tatika atu defende mak sala nunee halo ex-PM Fretilin nian no bankada parlamentar Fretilin tiru hikas sira nia ain tuban.

Husi sorin ida, ita hotu la hatene se xefe bankada parlamentar Fretilin iha informasaun no hatene ka lae Fretilin nia governo halo korrupsaun, nune halo deputados sira husi Fretilin badinas tebes koalia korrupsaun maibe sira nia akuzasaun mos makaas tebes katak governo AMP halo korrupsaun nebee boot.

Ita la hatene se deputados sira aktuais husi Fretilin sira nebee uluk la halo parte Mari Alkatiri nia ka partido Fretilin nia governo inosente duni kona ba korrupsaun nebee ejiste iha ministerio finansas governo Fretilin nian ka sira buka taka malu, ita la hatene, so sira rasik mak bele hatan ba sira nia-an.

Iha hipoteze tolu mak bele dudu sira sai nunee:

Ida, xefe bankada aktual Fretilin nian ho deputados sira seluk nebee iha nia influensia ba nia xefe, sira hotu falta de informasaun kona ba sira nia ministra halo korrupsaun durante iha governo;

Rua, xefe bankada parlamentar Fretilin korrobora ho korruptor sira no taka matan akuza governo AMP ho objektivu atu halo korrupsaun politika (lohi opiniaun publika ho povo Timor) hodi nunee bele hetan opiniaun publika nebee favorese ba partido Fretilin ho nia lideransa;

Tolu, bele mos xefe bankada parlamentar la iha autoridade no falta de vizaun, hodi nunee lori povo nia naran iha uma fukun produz deklarasaun nebee la iha fundamentu faktual ka goza no abuza lejitimidade no direitu atu halo deklarasaun nudar reprezentante povo nian ho objektivu ba interesses politiku-partidariu nian.

Agora ita hotu la iha ona duvida, tanba PM Kay Rala Xanana Gusmão fo hatene ona ba opiniaun publika, katak de faktu se mak korruptor boot liu iha ukun-an nian laran, pelu menus to'o biban ida nee, ho dadus nebee xefe governo AMP nian hatudu sai kona ba korrupsaun iha ministra finansas Fretilin nian, embora foin dadus parsial maibe justifika katak se mak halo korrupsaun boot liu nee Fretilin nia ministra.

Kontrata assessor ida mil dolares por dia hodi nunee assesor nee tenke manan 23 mil depois de servisu ka la servisu loron 23 remata ka manan 42 mil dolares depois de ajuda ministra Madalena Boavida durante loron 42 ?

Nee la'os korrupsaun nebee ho nia punisaun bai-bain maibe krime, nebee bai-bain sarjana supermi sira bolu korruptor kelas kakap !

Ita imajina, assessor ida mak hetan ida nee se kontrata assessor 3 ka 4 osan hira mak estadu gasta, osan tokon hira nebee atu aplika ba povo tomak nia nesesidades hira mak la fakar ba ema na'in 3 ka 4 nee?

Pior liu tan mak se ministerio finansas nia kontrata assesor sanulu ba leten ! Agora ita ka povo Timor mos iha ona informasaun kona ba governo AMP kontrata assessores internasionais sira nebee manan osan boot, maibe afinal governo la hasai osan estadu RDTL nian hodi selu assesores sira nee, katak assessores sira manan osan boot tanba sira nia kurikulum tuir nivel internasional nee instituisaun internasional (PFMCBP) mak selu, osan la'os sai husi OE nebee governo aprezenta liu ba.

Nee'duni partido Fretilin nia ema, liu-liu ex-PM Mari Alkatiri la iha moral nem pingo ida atu kritika PM Xanana Gusmão ho nia governo. Ita haree deit dados nebee Mari Alkatiri fo sai ba publiku iha loron rua liu ba kona ba assessores sira nebee "ministra finansas nian Dª Emilia Pires" kontrata (?), ex-PM no SG Fretilin hateten katak assesores na'in 60 to'o 80, enkuantu iha realidade ministra finansas AMP nian sai intermedia deit hodi kontrata assessores na'in 48 maibe ema promotores na'in 8 husi (PFMCBP) mak selu assessores na'in 48 nee.

Nee hatudu katak Dr. Mari Alkatiri bosok teen, buka lohi povu ho dadus falsu atu taka ninia governo nia pratika korrupsaun nebee nivel aas tebes.

Dilema foun nebee Mari Alkatiri hasoru mak deputados sira husi partido Fretilin iha Parlamento Nacional. Maibe dilema nee mosu tanba SG Fretilin nudar lider maximu partido historiku nee mak la iha duni autoridade no la iha credibilidade ba nia militantes sira.

Alem de la iha autoridade, hatudu mos katak SG Fretilin la hatene tau ordem iha partido nia laran, partido desorganizadu, la iha koordenasaun etc.

Nunee, deputados sira husi bankada parlamentar Fretilin produz no divulga deklarasaun sira nebee la salvaguarda politikamente SG no ex-PM Mari Alkatiri, tau nia ba situasaun embarasoza nebee halo Dr. Mari Alkatiri koalia mangame deit. Temi assessores 48 sai fali 60 ka 80. (dala ruma nia 'Alkatiri' fó valor ba assessor nain 48 ne´e, ida vale ema nain rua ka tolu).

Komiku fali!

Diak liu KAK halo investigasaun kona ba pratika korrupsaun, desde I Governo Konstitusional to'o IV Governo Konstitusional, hodi nunee, sulan hotu korruptores sira iha prizaun.


Milagre iha mundo rai klaran nebee ema mundo tomak fiar mak Aparição da Nossa Senhora de Fátima iha tinan 90-resin liu ba. Maibe iha Timor se uluk, depois de ukun-an ema ruma servisu manan dolar 200 maibe liu tiha tinan 5 ka 6 iha buat hotu, nee la'os milagre nebee mosu ba nia maibee ema sira nee mak korruptor, desvia estado no povo nia osan ba nia-an rasik hodi sai riku matak.

Ida nee mos dezafiu ka sadik boot ida nebee KAK sei hasoru. KAK iha duni vontade atu kombate korrupsaun ka lae ? Se KAK iha duni vontade mak ema sira nebee kiak hori uluk hori otas maibe to'o ukun-an teki-teki sai riku, KAK sei sita hotu riku soin hirak nee husi ema sira nee hotu hodi nunee bele kura moras korrupsaun iha Rai Doben Timor-Leste hahú husi abut kedan.

*Editor Forum-Haksesuk

Nota: Repost husi Forum Haksesuk
http://forum-haksesuk.blogspot.co.uk/2009/05/pm-kay-rala-xanana-gusmao-akuza-governo.html

Sem comentários:

Enviar um comentário

Publicação em destaque

"ÉS VIVA"

"És viva" A todas as mulheres Estás triste, Estás só Porque ninguém te fala Porque ninguém te liga Ninguém quer saber d...