Lakon no Tristeza Hafalun Povu-Sarani Timoroan Sira

Dom Basilio Nascimento

Sentimentu kle'an konsternasaun no taridu nebe dada'uk hafalun povu timor no sarani ho falesimentu Amo Bispo Dom Basílio de Nascimento, halo hau rasik mos la konsege tahan-an ho tristeza!

Los duni, Timor lakon "Bibi-atan" di'ak ida, nebe iha vida nudar Amo Bispo sempre hatudu kbi'it, lisaun honestidade, intelektualidadi, humanismu, relijioza no domin ba patria, nebe sempre prontu inspira, sai exemplu ba nia emar (sarani), liliu ba foin-sa'e sira nakonu ho vizaun orientadu ba futuru. 

“É muito duro pensar em Timor sem ter aquele sorriso aberto, franco, e a visão de D. Basílio", habadak Ana Gomes nia liafuan iha jornal digital 7MARGENS.

Sim, tebes duni, nahan todan ba Timor, iha tempu badak lakon nia figura WA'IN na'in tolu, husi José António Gomes da Costa (Ma’Hunu Bulerek Karatayano), hafoin Max Stahl (Max Christopher Wenner) no agora Dom Basílio do Nascimento. Maun Ramos-Horta, iha nia pajina FB mos sinti hanesan, e, de facto, "Timor-Leste sai ki'ak liu-tan" ho sira nia "ADEUS" ba mundu seluk.

Nune'e, iha pajina ne'e hau fahe mos emosaun triste no lakon hamaluk ho timoroan sira hotu ba momentum ida ne'e, no fiar katak Amu Bispo hakmatek ho dame iha Reinu Lalehan, no sentidu kle'an kondolensia ba familia enlutada.

Hamutuk ita harohan, nudar timoroan no katoliku, encoraja malu iha tempu lutu ne'e, atu honra-mos matebian nudar ema ida,  Amu ida no kna'ar kumpridu "Misaun Maromak" nian iha mundo, no em particular iha rai doben Timor-Leste.

Eis, liafuan sábio Amu Basilio nian ba ita atu reflekte: "Se mak la'o barak, sei hetan barak, sei sai matenek, no sei iha esperiensia barak".

Dalia Kiakialir
31 Outubru 2021
Oxford, UK