 |
Martinho G S Gusmao
|
Hanesan hau dehan tiha ona, konaba filosofia politica hau banati tuir John Rawls (liberalismo) ho Jürgen Habermas (republicanismo). Hau le sira na’in rua nia opus magnus (karya utama), liu-liu artigo debate no livro seluk konaba ba sira na’in rua nia confrontação. Hau aceita analisa AGB nian konaba “CONSENSO”, maibe la hasoru malu. Desafio nebe AGB foti mak nia frase be dehan nune’e “Iha momentu ne’ebe sira to’o iha faze ida diskorda ba malu (laiha consensus), ne’e laos problema, maibe ne’e konsidera nudar aset (riku-soin). Ekseptu, diskordansia ne’e hamosu aktu ruma ne’ebe kontra-lei”. Ida ne’e mak impressionante (menarik) maibe mos intrigante (menjebak). Tanba saida? Tanba, wainhira to’o iha “Lei”, Habermas ko’alia konaba “discourse theory of law and democracy”, Rawls dehan “justice as fairness”. Problema nebe nakloken mak “subtilitas applicandi” – oinsa mak aplica lei ninia “CONSENSO” lerek?
Solução ida nebe AGB hato’o mak “Konaba aktu politika Prezidente Republika Francisco Guterres Lu-Olo nian akredita no reafirma viabiliza VIII Governu Konstitusional, ne’e refleta kompetensia rasik Prezidente Republika nudar orgaun Unipesoal ida”. Saida mak “órgão unipessoal” ne’e? Se ida ne’e mak los, então AGB la consistente ho CONSENSO. Basá iha “consenso” nia laran, la iha “unipessoal” ka “unilateral”. Tenki iha “interpessoal” ka “multilateral”. CONSTITUIÇÃO labele hakruk ba “unipessoal”. Kecuali, “monarquia absoluta”. Maski Supremo Tribunal da Justiça (STJ) la iha, ne’e la significa PR mak hola “kompetensia rasik”. Ka, tan AGB fiar “unipessoal” mak halo “consenso” sai de’it hanesan “lips service” no husik PR halo tuir nia hakarak?
Justamente iha fase ida ne’e mak hau concorda ho AGB konaba “paradigma foun” PATRIOTISMO CONSTITUCIONAL, maibe iha nível “teoria” ho “metodologia”, hau lao tuir dalan seluk.
(1) TEORIA: “A PRÁTICA É O CRITÉRIO DA VERDADE”
Dalan nebe hau hetan mak debate entre J. Habermas hasoru Hans-Georg Gadamer. Hau nia tese iha Pontificia Universidade Gregoriana, Roma (2005) ko’alia konaba “legal hermeneutic” nebe foti husi sira na’in rua nia debate. Tese ne’e iha Ingles, halo defesa iha Italiano no publica iha Bahasa Indonesia mak ho titulo: Hans-Georg Gadamer: Penggagas Filsafat Hermeneutik Modern yang Mengagungkan Tradisi, Kanisius: Yogyakarta, 2013. Hau estuda “tradição’ Timor Leste, maibe la’os tradicionalista sa tan tradicionalismo. Los duni, hau nia carissimo amigo docente AGB dehan, “Ha’u nia Belun-diak uza konseitu sira demokrasia hodi esplika palavra nativu sira hosi Grande Lider Nicolao Lobato, Borja da Costa no Abilio Araujo nian hodi foritifika ninia kritika ba prosesu institusionaliza demokratizasaun iha Timor-Leste”. Hau tenki aumenta tan, lider supremo sira hanesan Sha’a Na Na no Jose Ramos Horta, no AGB nia figura favorit Xavier do Amaral. Ba hau, teoria ho metodologia ne’e hanesan ita ba hola roupa karik sukat tuir ita nia isin la’os sukat isin tuir roupa.
Iha CONSTITUIÇÃO ANOTADA nia laran dehan duni, “O Preâmbulo representa simultaneamente o morco histórico do nascimento do novo Estado soberano e o ‘registo’ da sua matriz genética. Justifica a rutura inerente à criação da ‘associação política’ emergente e estabelece uma ponte entre o passado e o futuro da comunidade, transformação a destruição da ordem antiga em titulo de legitimação da nova ordem que a Constituição visa fundar. Por isso, convoca a história e a memória da própria comunidade e impor o seu reconhecimento a todos os adversários, no plano interno e internacional”.
Ho liafuan badak, hau halo duni NARATIVA liu husi PALAVRA NATIVU atu hare hikas ema hirak nebe halo “marco histórico” (Xavier do Amaral, Nicolau Lobato, Sha’a Na Na, Borja da Costa) nebe hatur PATRIOTISMO liu husi sira nia hakerek, sira ne’e mak hakerek Timor nia “matriz genética”. Liu husi liafuan sira hanesan “Povo Maubere”, “Timores”, “FRETILIN”, “FALINTIL” ... ema hirak ne’e mak “estabelece uma ponte entre o passador e o futuro”, hakotu tali husi “ordem antiga” (colonialismo). Hau hakerek ona konaba Nicolau Lobato no continua atu promove ninia pensamento filosófico (maski ema balun halo piada iha FB dehan “se mak o representa hau”), tan hodi hakerek konaba nia, hau “convoca a historia e a memoria” tuir AGB nia titulo “Liberdade de Expressão”. Hau mos hein ho entusiasmo wainhira AGB halo hela pesquisa no hakerek biografia Xavier do Amaral (hau sei disponível tebes halo leitura no sugestão ba livro ne’e); hau hatutan ho pesquisa no hakerek konaba Sha’a Na Na ho Borja da Costa; iha mos comunidade Sahe nian nebe hakarak hakerek konaba ba nia.
Iha hau nia campus, hau orienta ona estudante lubuk ida hakerek konaba “nacionalismo”, “patriotismo”, “descolonização da interioridade”, husi Nicolau Lobato, Xavier do Amaral, Sha’a Na Na, Borja da Costa, Ramos Horta hodi hatur iha contexto Cicero, Hegel, Karl Marx, Gramsci, Gadamer, Heidegger, Paul Ricouer no seluk tan. Iha projecto ida ne’e hau “provoca” hau nia estudante sira atu hakerek “historia e memoria” ba Timor-Leste nia líder rasik la’os deit hatene iha “interno”, maibe liu-liu “internacional”, confronta ho filosofo boot sira. Iha estudante ida hakerek konaba “Cultura Democrática”, seluk “Ukun Rasik’An (filosofia de liberdade, filosofia da libertação” no ho orgulho tebes hau orienta estudante feto ida hakerek konaba “Barlaque” hatur iha filosofia comunitarismo (cosmologia “uma kain”, metafisica “uma lulik”).
Tanba saida mak hau haktuir buat hirak ne’e? Iha terminologia ida nebe hau hanoin importante tebes, AGB foti husi Erns Friedrich Schumacher (1977) “adaequatio rei et intellectus”. Hau la dun toman ho Schumacher nia pensamento. Uluk sei estuda iha Malang, hau le nia livro “Kecil itu Indah” (Small is Beautiful). Oituan nebe hau bela hanoin hetan katak, nia ateu ida. Maibe, depois nia la fiar ona ba materialismo, liu-liu Karl Marx nian. Nune’e nia fila atu sai católico radical, hahu estuda Doutrina Social da Igreja, hahu husi Rerum Novarum Papa Leão XIII (1891). Maski AGB la explica termilogia husi Latin ne’e, maibe hau hatene katak liafuan hirak ne’e mai husi São Tomas de Aquino (Summa Theologia I, 16, 2) – ita nia conhecimento bele sai metin (adequation) wainhira ita nia hanoin (matenek) ne’e bele koko iha moris. Husi S. Tomas, matenek nain sira be tuir nia mak John Locke, I. Kant, Hegel to’o Marx, no ikus liu mak Wittgenstein. Hau hakarak informa mos katak, iha nível teoria social, Karl Mannheim nia livro “Ideology and Utopia” fo contribuição boot ba “adaequatio rei et intellectus”. Fila ba Habermas, ninia livro rua Knowledge and Human Interest (1968) no Theory and Practice (1973) hatur oinsa mak ema nia hanoin (teoria; intelecto) hakait ho moris loro-loron nian.
Se AGB la “keberatan”, hau hakarak dehan katak expressão “A PRÁTICA É O CRITERIO DA VERDADE”, hatudu katak Nicolau Lobato hatene momos S. Tomas de Aquino no le barak Karl Marx. De facto, nia hamutuk ho Xanana, Afonso Redentor, Abilio Araujo, hanesan mos Xavier do Amaral no nacionalista barak tan mak estuda iha Seminario Soibada, Dare no Lahane husi jesuíta sira, tan ne’e sira nia kakutak ne’e Aristotélica Tomista nebe sai centro ba Escolástica. Atu halo fasil, “Verdade” ne’e hatur iha “Intellectus”; “rei” (res) hanesan ho “praxis”; “adequatio” ne’e mak “critério” (sasukat). Tan ne’e, wainhira hato’o matéria filosofia politica hau kaer CONSTITUIÇÃO no foti PREÂMBULO hodi hakait ba pensamento Xavier do Amaral, Nicolau Lobato, Borja da Costa, Sha’a Na Na hamutuk ho Abilio Araujo no Jose Ramos Horta. Keta hanoin hau halo “discriminação” ba ema seluk. Hau halo ona pesquisa, no hetan de’it “texto classico” husi Nicolau Lobato, Borja da Costa, Sha’a Na Na, Xavier do Amaral ho Abílio Araújo (hau hetan texto ida de’it husi Ramos Horta – “Maubere Meu Irmão”). Iha filosofia hermenêutica, ami sura de’it mak “texto” (discurso, poesia, documento). Hau dehan “terus terang” ba Abilio katak ninia acção política lao kleuk; maibe ninia “pensamento original” furak tebes. Liu-liu iha MANUAL POLITICO & PROGRMA FRETILIN. Abilio mos dehan katak sira husi Lisboa mai la’os “fundador” FRETILIN. Sira mai lori conceito FULIN (Frente Unida da Libertação e Independência Nacional). Abilio fohin mak hatene FRETILIN wainhira too ona iha Dili (11 Setembro 1974) hamutuk ho Sahe, Mau Lear, Gui Araujo no Mau Seran. Se mak fo naran FRETILIN? Borja da Costa!
Fila ba Habermas, iha Historikerstreit (debate husi historiador sira), pergunta boot liu mak – tan sa rai ida hanesan Alemanha ho ema matenek boot deit no civilizado (Goethe, Kant, Schiller) bele hamosu tragedia Auschwitz (halo crime boot hasoru humanidade)? Iha Auschwitz mak Hitler haruka oho ema barak, ema Judeo sira de’it 6,000,000 resin. Hatur iha Timor-Leste nian karik, oinsa mak rai boot hanesan Portugal ho Australia bele fase liman no husik Indonesia halo invasão 1975, hodi halakon ema 200,000 resin to’o iha 1999? Iha assunto hanesan ne’e mak Habermas hare katak historia laos politico sira mak haktuir, maibe intelectual sira mak debate. Nia hanaran ida ne’e hanesan “the new conservatism ... Their influence is more easily measure in terms of their intelectual stock than in terms of numbers of votes” (Cf., J. Habermas, The New Conservatism, 1997: 22).
Hau hanoin, iha caso ida ne’e, hau orgulho hodi dehan katak mosu ona KALADI ida ho FIRAKU ida halo debate konaba historia Timor nian. Sira nain rua hahu Historikerstreit iha media, no hahu ona “new conservatism” ida – katak, Firaku ho Kaladi la’os ona problema nia hun no abut, maibe energia foun atu foti Timor foun ida.
Hau hanoin, “narrativa” iha “preâmbulo” CRDTL ninia “matriz genética” labele ses husi debate Abílio Araújo ho Nicolau Lobato nebe hatur uluk kedas “fini” ba nacionalismo/ patriotismo nudar “enigma” no “sagrados da alma”. Tutan ba Borja da Costa nebe hahu formula conceito “Ukun Rasik’An” ho “Povo Maubere” (haturan Ramos Horta), halo poema “Pátria! Pátria!” (Afonso Redentor halo musica ba hino nacional), Sha’a Na Na defini “patriotismo” liu husi poema “Pátria”; to’o klimaks mak Xavier do Amaral proclama Independência!
Husi paradigma PATRIOTISMO CONSTITUCIONAL, hau foti tese tolu (3) housi PREÂMBULO hodi elabora hau nia teoria (filosofia) politica iha hau nia docência:
1) “... erigir uma CULTURA DEMOCRÁTICA”
2) “... estabelecer as regras da DEMOCRACIA PLURALISTA”
3) “... a construção de um país justo e próspero e o desenvolvimento de uma sociedade SOLIDÁRIA e FRATERNA”.
Hau bele dehan de’it katak, “paradigma” ne’e hanesan “we matan” ida nebe hau hetan. Teoria no filosofia nebe hau desenvolve durante hanorin ne’e hanesan “kdadalak”. Iha mundo académico ne’e teoria/ filosofia nebe moris nafatin, moris ba bebeik. Depende ba ema ida-idak hili tuir nia “sensibilidade” (ate, sentimento). Iha filosofia, la iha “verdade conclusiva” maibe abertura iha discussão aberta (discourse theory).
Iha artigo tuir mai, hau sei hatutan assunto ida ne’e ...!
Martinho G S Gusmao
Sem comentários:
Enviar um comentário